Administrata Trump dëshiron që shtetet të paguajnë 1 miliard dollarë për tё qёnё anёtarё në Bordin e Paqes, raportoi fillimisht Bloomberg të shtunën në mbrëmje, duke cituar një draft të statutit të grupit të propozuar.
Bordi i Paqes është një organ ndërkombëtar i miratuar nga Këshilli i Sigurimit i Kombeve të Bashkuara në nëntor 2025. Ai u krijua për të mbikëqyrur armëpushimin mes Izraelit dhe Hamasit.
Sipas draftit të parë nga Bloomberg, Donald Trump pritet të jetё kryetari i parë i grupit dhe do të vendosë se cilat shtete do të ftohen si anëtare. Vendimet do të merren me shumicë votash, por kryetari do të ketë miratimin përfundimtar.
Shtetet anëtare do të shërbejnë për një mandat trevjeçar në bord, por mund të sigurojnë një vend të përhershëm duke paguar 1 miliard dollarë cash brenda vitit të parë nga hyrja në fuqi e statutit, thuhet në draft.
Një zyrtar amerikan i tha CNBC se nuk ka kosto për t’u bashkuar me Bordin e Paqes, por kontributi prej 1 miliard dollarësh do të garantonte anëtarësim të përhershëm. Mandati i grupit është të “rindërtojë të gjithë Gazën” dhe “pothuajse çdo dollar” i mbledhur do të shpenzohet për këtë qëllim. Grupi do të funksionojë pa “paga të tepruara dhe burokraci administrative të fryrë”, tha zyrtari.
Ende nuk është e qartë se ku do të mbahen fondet e mbledhura nga anëtarët e Bordit të Paqes.
Trump ka ftuar disa liderë botërorë, përfshirë kryeministrin kanadez Mark Carney dhe presidentin argjentinas Javier Milei, për t’u bashkuar me Bordin e Paqes për Gazën, i cili do të jetë pjesë e Bordit më të madh të Paqes, raportoi Bloomberg.
Disa vende të tjera, përfshirë Hungarinë, Indinë, Jordaninë, Greqinë, Qipron dhe Pakistanin, kanë konfirmuar se kanë marrë ftesë për në Bord, raportoi AP News të dielën.
Turqia, Egjipti, Paraguai dhe Shqipëria ishin ftuar më herët. Lista e plotë mund të shpallet nga SHBA në ditët në vijim, sipas Associated Press.
Nën drejtimin e Trump, grupi ka krijuar gjithashtu një bord ekzekutiv themelues për të “mbikëqyrur një portofol të përcaktuar, kritik për stabilizimin dhe suksesin afatgjatë të Gazës”, thuhet në një deklaratë të Shtëpisë së Bardhë të premten.
Anëtarët e bordit ekzekutiv përfshijnë Sekretarin amerikan të Shtetit Marco Rubio, të dërguarin special Steve Witkoff, dhëndrin e Trump Jared Kushner, ish-kryeministrin britanik Tony Blair, drejtorin ekzekutiv të Apollo Global Management Marc Rowan, presidentin e Bankës Botërore Ajay Banga, dhe zëvendëskëshilltarin amerikan për sigurinë kombëtare Robert Gabriel.
(Burimi: CNBC)
