Mozaiku “Dielli i ditës tjetër” i artistes Blerta Kambo do të vendoset përfundimisht në krahun lindor të Arkivit Qendror Shtetëror të Filmit (AQShF), duke u shndërruar në një pikë takimi mes trashëgimisë kulturore dhe mesazhit për ndërgjegjësim shëndetësor.
Vepra e njohur edhe me emrin “Shqipja”, është një ndërhyrje artistike e mbështetur nga MTKS, e cila i shton hapësirës arkivore një dimension të ri muzeal. Përmes një gjuhe vizuale të fortë, mozaiku nuk kufizohet në rolin e një objekti dekorativ, por vendos një dialog të drejtpërdrejtë me shikuesin, duke ngritur pyetje mbi dhimbjen, qëndrueshmërinë dhe procesin e rindërtimit njerëzor.
E ndërtuar nga fragmente të vogla dhe të copëzuara, figura qendrore përfaqëson gruan si trup dhe kujtesë: një qenie që bart plagë, por që vazhdon të ngrihet. Ngjyrat dhe forma bashkohen për të krijuar një imazh që flet për kohën, për durimin dhe për forcën që lind nga thyerja.
Instalacioni u shfaq për herë të parë në nëntor të vitit të kaluar në fasadën e Muzeut Historik Kombëtar në Tiranë. Në atë hapësirë simbolike, Blerta Kambo rimori figurën femërore të mozaikut monumental “Shqipëria”, duke e zhvendosur nga narrativa heroike drejt një leximi bashkëkohor dhe njerëzor.
Figura paraqitet me kokë të qethur dhe me një shenjë të dukshme në gjoksin e djathtë, një referencë e drejtpërdrejtë ndaj grave që përballen ose kanë kaluar përmes kancerit të gjirit. Ky transformim e shndërron heroinën mitike në një grua reale, të ndjeshme, të lënduar, por të vendosur për të ecur përpara.
“Dielli i ditës tjetër” mbetet kështu një thirrje vizuale për ndërgjegjësim dhe solidaritet, duke kujtuar se një në dymbëdhjetë gra përballet me diagnozën e kancerit të gjirit dhe se arti mund të shërbejë si hapësirë reflektimi, force dhe shprese.
