Pas më shumë se 600 vitesh e fshehur nën ujërat pranë Kopenhagenit, është zbuluar ajo që arkeologët e quajnë tashmë super-anija më e madhe mesjetare e gjetur ndonjëherë. Strukturat prej druri të ruajtura në mënyrë të jashtëzakonshme u zbuluan gjatë sondazheve nënujore për një projekt urban të ri bregdetar, por shpejt u kuptua se nuk bëhej fjalë për një rrënojë të zakonshme.
Anija, e emërtuar Svælget 2, rezulton të jetë një “cog” tregtare e shekullit XV, rreth 28 metra e gjatë dhe me kapacitet transporti deri në 300 tonë. Për herë të parë, studiuesit kanë përpara një pamje të plotë të një anijeje të tillë: trupi i saj i paprishur, elementë të direkut, pjesë të kuvertës dhe hapësira të brendshme që tregojnë se si organizohej jeta në bord. Analizat e drurit tregojnë se materiali vjen nga rajoni i Pomeranisë dhe nga Holanda, duke dëshmuar për rrjete të zhvilluara tregtare në Evropën Veriore shumë përpara epokës së kolonizimeve oqeanike.
Gjatë kёrkimeve nёnujore janë gjetur pjata të pikturuara prej druri, enë bronzi gatimi, këpucë lëkure, krehëra dhe rruzare lutjeje. Këto objekte personale tregojnë se marinarët nuk ishin thjesht punëtorë në një kuvertë të hapur, por njerëz që jetonin për periudha të gjata në det, me sende të përditshme dhe rituale personale. Madje është zbuluar edhe një kuzhinë e ndërtuar me rreth 200 tulla dhe pllaka qeramike – diçka e paprecedentë për anijet mesjetare të gjetura deri më sot.
Nuk është gjetur ngarkesa e anijes, por tё dhёnat tregojnё se ajo ishte plotësisht e ngarkuar kur u fundos. Studiuesit mendojnë se transportonte mallra masive si drithë, kripë apo lëndë drusore. Gjithashtu, nuk ka asnjë shenja armatimi, çka tregon se ishte njё anije tregtare, jo luftarake.
Zbulimi po cilësohet si një pikë kthese për arkeologjinë detare europiane, sepse sjell prova fizike për shkallën reale të tregtisë mesjetare, e cila deri tani njihej më shumë nga dokumente sesa nga objekte konkrete.
Anija ndodhet aktualisht në proces konservimi në Muzeun Kombëtar të Danimarkës. Megjithatë, mbetet ende e paqartë nëse dhe kur do të ekspozohet për publikun, pasi ruajtja e një strukture kaq të madhe kërkon fonde dhe teknologji afatgjata.
Pas gjashtë shekujsh heshtje nën det, Svælget 2 po rishkruan historinë e detarisë mesjetare — dhe po tregon se Evropa e Veriut kishte ndërtuar “super-anije” shumë përpara se bota të hynte në epokën moderne të lundrimit.
(Burimi: dailygalaxy)
