Prokuroria e Përgjithshme ka konfirmuar zyrtarisht se gjyqtarja e GJKKO-së, Irena Gjoka, ka qenë e dënuar në Greqi dhe se këtë fakt e ka fshehur në Formularin e Vetëdeklarimit të dorëzuar në vitin 2016. Rezultatet e këtij verifikimi i janë përcjellë tashmë Këshillit të Lartë Gjyqësor, i cili pritet të marrë vendimin përfundimtar mbi fatin e gjyqtares.
Sipas informacionit të bërë publik nga RTSH, Prokuroria e Përgjithshme ka konstatuar se dokumenti i publikuar mbi dënimin në Greqi është autentik dhe se gjyqtarja nuk e ka deklaruar këtë fakt në formularin e vetëdeklarimit – dokument që, sipas ligjit, ekziston pikërisht për të parandaluar që persona me ndalime ligjore të ushtrojnë funksione publike.
Në njoftimin zyrtar, Prokuroria sqaron se procesi i verifikimit të thelluar u regjistrua më 8 maj 2024 në Sektorin e Dekriminalizimit, me kërkesë të Komisionit të Zhvillimit të Karrierës në KLGJ. Pas verifikimeve brenda dhe jashtë vendit, më 19 janar 2026 është miratuar raporti përfundimtar dhe i është dërguar Këshillit të Lartë Gjyqësor, i cili tani ka përgjegjësinë ligjore për të vendosur mbi kushtet e ndalimit të gjyqtares në bazë të ligjit për integritetin e zyrtarëve publikë.
Ndërkohë, Prokuroria e Posaçme konfirmon se ndaj gjyqtares Gjoka vijon një hetim penal, i nisur në qershor 2025 për veprën e falsifikimit të vulave, stampave ose formularëve, pas denoncimeve publike të kreut të PD-së, Sali Berisha. SPAK deklaron se çështja është në fazë hetimesh paraprake dhe se nuk mund të japë detaje për shkak të sekretit hetimor.
Por përtej përmbajtjes së raportit, rasti ka hapur një pyetje të madhe institucionale: nëse formulari i vetëdeklarimit është dorëzuar që në vitin 2016, pse verifikimi i thelluar u nis vetëm në vitin 2024? Dhe pse një fakt kaq thelbësor – ekzistenca e një dënimi penal jashtë vendit – nuk u zbulua më herët nga mekanizmat që ligji parashikon pikërisht për këtë qëllim?
Ligji për dekriminalizimin dhe vetë sistemi i formularëve të vetëdeklarimit u krijuan për të shmangur pikërisht raste të tilla. Institucionet kishin për detyrë jo vetëm të arkivonin formularët, por t’i verifikonin. Megjithatë, në këtë rast, dokumenti i vitit 2016 duket se ka qëndruar për vite me radhë pa një kontroll efektiv – derisa çështja u bë objekt denoncimesh politike dhe hetimesh penale.
Sot, verifikimi është përfunduar. Fakti i padeklaruar është konfirmuar. Vendimi i fundit i takon KLGJ-së. Por dilema mbetet: a ishte ky një zbulim i vonuar, apo një mospёrmbushje detyre nga organet pёrgjegjёse?
Ndërkohë, një gjyqtare e një prej institucioneve më të rëndësishme të drejtësisë në vend – Gjykata e Posaçme Kundër Korrupsionit dhe Krimit të Organizuar – përballet me një proces që vë në pikëpyetje vetë themelet e integritetit institucional.
Njoftimi zyrtar i Prokurorisë
“Mbi bazën e kërkesës së Komisionit të Zhvillimit të Karrierës në Këshillin e Lartë Gjyqësor, më datë 08.05.2024 në Sektorin e Dekriminalizimit të Prokurorisë së Përgjithshme është regjistruar me nr.40 procesi per verifikimin e thelluar të deklarimeve të bëra në Formularin e Vetëdeklarimit date 22.04.2016, për subjektin Irena Gjoka (Shpata, Maneku), gjyqtare në Gjykatën e Posaçme Kundër Korrupsionit dhe Krimit të Organizuar.
Pas kryerjes së të gjitha verifikimeve të mundshme brenda dhe jashtë vendit, më datë 19.01.2026, Prokuroria e Përgjithshme ka vendosur miratimin e rezultateve të verifikimit, vendim të cilin po këtë datë ja ka përcjellë Këshillit të Lartë Gjyqësor si organ përgjegjës për verifikimin e kushteve të ndalimit në zbatim të ligjit nr.138/2015 “Për garantimin e integritetit të personave që zgjidhen, emërohen ose ushtrojnë funksione publike”, dhe Vendimit të Kuvendit nr.17/2016 “Për përcaktimin e rregullave të detajuara mbi zbatimin e ndalimeve të parashikuara në ligjin nr.138/2015 “Për garantimin e integritetit të personave që zgjidhen, emërohen ose ushtrojnë funksione publike””.
(Burimi: RTSH)
