Një rrëshqitje masive dheu në malin Maunganui, në Ishullin Verior të Zelandës së Re, ka lënë pas një situatë dramatike kërkim-shpëtimi, me gjashtë persona ende të zhdukur, mes tyre edhe dy adoleshentë, ku më i riu është vetëm 15 vjeç. Policia ka bërë gjithashtu thirrje për informacion për tre persona të tjerë që dyshohet se mund të kenë qenë në zonë, por që besohet se janë turistë ndërkombëtarë dhe mund të jenë larguar tashmë.
Ngjarja ndodhi pas disa ditësh me reshje të rrëmbyeshme shiu që goditën rajonin, duke ngopur tokën dhe rritur rrezikun e rrëshqitjeve. Kampingu në malin Maunganui, një destinacion i njohur turistik dhe vend i shenjtë për komunitetin Maori, u përfshi papritur nga masa e dheut, duke shtypur tenda dhe makina kampingu.
Ekipet e emergjencës, së bashku me qen nuhatës, vijojnë kërkimet pa ndërprerje, megjithëse autoritetet kanë deklaruar se gjatë ditës së fundit nuk janë zbuluar shenja jete nën rrënoja. “Ne po punojmë 24 orë në ditë dhe nuk do të lëmë asnjë gur pa lëvizur,” deklaroi komandanti i policisë lokale, Tim Anderson.
Tragjedia nuk është e izoluar. Në Welcome Bay, një zonë aty pranë, një tjetër rrëshqitje dheu goditi një banesë, duke shkaktuar vdekjen e një gjysheje dhe nipit të saj. Një person tjetër u plagos rëndë. Autoritetet konfirmuan se një nga viktimat ishte shtetas kinez, ndërsa ambasadori i Kinës në Wellington shprehu ngushëllime për familjet e prekura.
Kryeministri i Zelandës së Re, Christopher Luxon, vizitoi zonën e prekur dhe vlerësoi mobilizimin e komunitetit dhe profesionalizmin e ekipeve të reagimit. Ai paralajmëroi se rreziku nga rrëshqitjet dhe përmbytjet mbetet i lartë, ndërsa stuhitë me reshje të forta dhe erëra priten të vazhdojnë edhe gjatë fundjavës.
Ndërkohë, kërkimet vijojnë edhe për një burrë tjetër të zhdukur në veri të Auckland, i cili u rrëmbye nga ujërat e një lumi gjatë përmbytjeve.
Autoritetet u bëjnë thirrje qytetarëve të shmangin zonat e rrezikuara, ndërsa vendi përballet me një nga episodet më të rënda të motit ekstrem të viteve të fundit.
(Burimi: BBC)
