Gjashtë persona janë plagosur pas një sulmi me thikë gjatë një demonstrate të komunitetit kurd në qytetin e Antverpit, në Belgjikë, mbrëmjen e së enjtes. Sipas policisë lokale, dy nga të plagosurit ndodhen në gjendje kritike në spital.
Incidenti ndodhi pranë Sheshit të Operas (Operaplein), ku rreth 50 persona ishin mbledhur për të protestuar në mbështetje të kurdëve në Sirinë veriore. Demonstrata kishte nisur paqësisht, me pjesëmarrjen e familjeve, grave dhe të rinjve, ndërsa valëviteshin flamuj kurdë dhe pankarta politike.
Situata u përshkallëzua menjëherë pas përfundimit të protestës. Sipas dëshmitarëve, një grup burrash që ishte përzier më herët me demonstruesit nxori papritur thika dhe nisi të godiste njerëz pa dallim. Katër të plagosur u gjetën në shesh, ndërsa dy të tjerë në rrugët përreth.
Policia ka arrestuar dy të dyshuar, të cilët mendohet se ishin infiltruar mes protestuesve. Hetimet paraprake e trajtojnë ngjarjen si vrasje në tentativë, ndërsa autoritetet kanë bërë të qartë se rasti nuk po hetohet si akt terrorist. Pamjet e kamerave të sigurisë po analizohen për të verifikuar nëse ka edhe persona të tjerë të përfshirë.
Përfaqësues të diasporës kurde në Belgjikë e kanë cilësuar sulmin si një akt të qëllimshëm kundër komunitetit kurd. Ndërkohë, policia ka rrethuar zonën dhe u ka bërë thirrje qytetarëve të shmangin qendrën e qytetit deri në përfundim të operacioneve hetimore.
Hetimet vijojnë.
(Burimi: The Guardian)
