Në një nga cepat më të largët dhe më pak të eksploruar të Afrikës Lindore, ndodhet një mrekulli e natyrës që njëkohësisht mahnit dhe frikëson. Është fjala për liqenin Natron, një liqen me ngjyrë të kuqe të ndezur që shtrihet në veri të Tanzanisë, pranë kufirit me Kenian.
Ky liqen i rrallë nuk është si asnjë tjetër në botë. Përveç pamjes që të lë pa frymë, ai fsheh një sekret të çuditshëm dhe paksa të frikshëm: çdo kafshë që bie brenda, mumifikohet, duke u ngurtësuar në një formë që duket si skulpturë guri.
Një pamje që duket e bukur nga larg, por vdekjeprurëse nga afër.
Në shikim të parë, liqeni Natron të josh me bukurinë e tij unike: ngjyra e kuqe e thellë dhe përplasja e rrezeve të diellit mbi sipërfaqen pasqyruese krijojnë një atmosferë që duket si një peizazh i pikturuar. Por, kjo bukuri mbart një anë të errët.
Uji i liqenit është shumë alkalin, me një pH që arrin deri në 10.5 – kjo është afër niveleve të amoniakut. Për më tepër, temperaturat brenda liqenit mund të shkojnë deri në 60°C. Kombinimi i këtyre faktorëve e bën mjedisin jashtëzakonisht të dëmshëm për shumicën e formave të jetës.
Shumë zogj të vegjël, lakuriq nate apo kafshë të tjera që bien aksidentalisht në liqen, ngurtësohen dhe ruhen nga përbërësit kimikë të ujit, duke u transformuar në mumie natyrore me pamje dramatike – si të ishin kthyer në “gurë”.
