Udhëheqësit botërorë u mblodhën në Davos për të diskutuar krizat më të mëdha gjeopolitike të kohës. Por imazhi që dominoi forumin këtë javë nuk ishte një tryezë negociatash — ishte Emmanuel Macron me syze dielli reflektuese në stil aviator.
Shfaqja e presidentit francez me syze “Top Gun” ndezi rrjetet sociale, meme-t dhe spekulimet: a ishte i lënduar? Po shmangte kontaktin me sy me Donald Trump? Apo thjesht kërkonte efekt skenik?
E vërteta doli më tokësore: Macron kishte një enë gjaku të plasur në syrin e djathtë — një hemorragji subkonjunktivale, që ai vetë e quajti “plotësisht beninje”. Por efekti publik ishte gjithçka tjetër veçse banal.
Sepse syzet që mbante Macron nuk ishin aksesor i zakonshëm. Ato prodhohen nga Maison Henry Jullien, një punishte artizanale në rajonin Jura në Francën lindore, me mbi një shekull histori. Dhe sapo u kuptua se presidenti mbante pikërisht modelin e tyre, kompania u përmbyt nga kërkesat.
Faqja e internetit u bllokua për orë të tëra, telefonatat nga optika në gjithë Francën nuk pushuan, dhe prodhuesi e përshkroi ditën si “të pazakontë edhe për një markë luksi”.
Modeli që mban Macron — Pacific S01 Double Gold — kushton rreth 659 euro. Syzet montohen me dorë, me një teknikë tradicionale ku ari lidhet me strukturën metalike në vend që të vishet sipër saj, duke i bërë jashtëzakonisht rezistente. Lentet UV prodhohen nga një tjetër kompani franceze, Dalloz.
Sipas drejtuesit të kompanisë, zyra e Macron kishte blerë më herët një palë si dhuratë diplomatike dhe një palë për përdorim personal. Presidenti, sipas prodhuesit, kishte insistuar që syzet të ishin “100% të prodhuara në Francë” dhe i bleu vetë — pa i pranuar si dhuratë.
Fabrika me vetëm 10 punonjës prodhon rreth 1,000 palë në vit. Tani, kërkesa është rritur ndjeshëm, ndërsa syzet e Macronit janë kthyer në simbol të papritur të luksit francez.
Një mjek francez komentoi me humor: “Syzet mbrojnë imazhin e tij më shumë sesa syrin.”
Dhe për Maison Henry Jullien, kjo ishte reklama më e vlefshme që nuk mund të blihej me para — por vetëm me një dalje publike presidenciale në momentin e duhur.
(Burimi: The Guardian)
