Duke publikuar Regjistrin e Kërkesave dhe Përgjigjeve për muajin Dhjetor 2025, SPAK, “shuan” thashethemet në një përgjigje drejtuar Dosja.al, ku thuhet shprehimisht në datën 26.12.2025 se: “Në përgjigje të kërkesës suaj, ju informojmë se Byroja Kombëtare e Hetimit (BKH) nuk e ka sekuestruar telefonin e Drejtorit të Policisë së Shtetit.”
Kjo përgjigje është si një shishe uji që përpiqet të shuajë një pyll që po digjet. Nëse Drejtori i Policisë ka kriter pune vetëm telefonin e pasekuestruar, atëherë Policinë e Shtetit pa frikë mund të thuhet se e ka marrë “flaka”.
Drejtoresha e Drejtorisë për Hetimet e Krimeve Kibernetike në Drejtorinë e Përgjithshme të Policisë së Shtetit, Ervina Gjana, para dy javësh u kontrollua dhe u sekuestrua në zyrën dhe në shtëpinë e saj, dhe kjo është një nga ngjarjet më të rënda që kanë ndodhur në zyrat e Policisë së Shtetit ndonjëherë.
Të premten e kaluar SPAK, BKH, bashkë me “policë” të ardhur nga Italia, gjetën një kat të tërë në mes të Tiranës, bosh. Aty ku duhet të kishte një sallë “Call Center” plot me punonjës që mashtronin pleqtë dhe të dëshpëruarit e Italisë, Spanjës apo Gjermanisë, mungonin telefonat, kompjuterët, tastierat, çdo gjë që Policia e Shtetit duhet ta kishte kapur në “flagrancë” muaj apo vite më parë.
Kati “Forex” në kullën Alban Tower Tirana (ATTI) punonte në “sytë” dhe “veshët” e Antikrimit kibernetik të Policisë së Shtetit.
Katet e kullës “Downtown One” janë mbushur plot me “Call Center” të tjerë, që çdo ditë parakalohen nga Drejtori dhe zëvendësja e tij në Policinë e Shtetit sa herë u bie rruga për në punë. 200 metra larg zyrave të drejtorit të “pasekuestruar” gjendet kulla me aktivitet që edhe ky nuk sekuestrohet asnjëherë.
SPAK dhe BKH nuk duhet të kujdesen për imazhin e drejtorit, që gjithsesi ia ka prishur “zëvendësja” e tij, por për lukuninë me “forex” që nga e premtja në të premte rifilluan përsëri të “shqyejnë” fatkeqët në telefon.
