Çdo individ mund të hapte deri dje faqen zyrtare të KPK-së, Komisionit të Pavarur të Kualifikimit dhe të shihte në transparencë të plotë çdo vendim që ishte marrë për një gjyqtar, prokuror ose ndihmës ligjor në 7 vitet e mandatit të këtij organi kushtetues me 12 komisionerë.
Ata u “përzgjodhën” mirë dhe u miratuan në bllok në vitin 2017 nga Kuvendi i Shqipërisë.
Për 7 vite, 12 komisionerët e KPK-së bënë Vettingun e 805 magjistratëve.
Emrat e Komisionerëve të KPK-së, apo quajtur ndryshe “Shkalla e Parë e Procesit të Vetingut”, janë këta:
- Roland Ilia
- Alma Faskaj (Vokopola)
- Brunilda Bekteshi (Vasha)
- Etleda Çiftja
- Firdes Shuli
- Genta Tafa (Bungo)
- Lulzim Hamitaj
- Olsi Komici
- Pamela Qirko
- Valbona Sanxhaktari
- Suela Zhegu
- Xhensila Pine
Komisionerët e KPK-së shkarkuan rreth 300 magjistratë duke “detyruar” edhe 105 të tjerë të jepnin dorëheqjen në 7 vite pune. Sistemit të drejtësisë iu krijuan 273 vakanca gjyqtarësh e prokurorësh, të cilët nuk janë plotësuar me magjistratë të rinj, as sot.
Rëndësia e vendimeve të KPK-së kaloi edhe vetë pritshmëritë fillestare. SPAK mori nën hetim 10 ish-gjyqtarë të Gjykatës së Lartë dhe Kushtetueses me bazë të vendimeve të shkarkimit nga KPK.
Në dhjetor 2024, pavarësisht shtyrjes së mandatit për dy vite, ky organ e mbaroi misionin kushtetues, sipas asaj që parashikoi në fillim ligji “Veting” nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”.
Pas 7 vitesh punë, KPK krijoi një databazë të rëndësishme të vendimeve për të gjithë sistemin e drejtësisë që u vetua prej tyre. Këto vendime, bashkë me njoftimet, ankimet dhe çdo informacion tjetër që lidhej me këtë organ, komisionerët, ndihmësit apo ONM-në dhe Komisionerin Publik, gjendeshin në faqen zyrtare publike Komisioni i Pavarur i Kualifikimit, me domain kpk.al.
Kjo faqe publike prej ditës së djeshme është ç’aktivizuar duke lënë në “terr” informativ të gjithë botën juridike apo mediatike që kanë nevojë të konsultojnë dhe informohen mbi vendimet e rivlerësimit të figurës, profesionalizmit dhe pasurisë së magjistratëve që sot janë në sistem, por edhe të atyre që janë larguar.
Zhdukja e faqes zyrtare të KPK-së, në këtë moment përplasje në sistemin politiko-juridik, ku qeveria, opozita i kanë shpallur “luftë” SPAK-ut dhe GJKKO-së, bёn tё lindin shumë dyshime se ky nuk është thjesht një “defekt” teknik, në riparim e sipër në epokën e “Diellës”.
Nëse faqja publike nuk rikthehet me të gjitha të dhënat që mbante brenda saj deri ditën e djeshme, atëherë ky do ishte një skandal më i madh se gjithë skandalet e tjera së bashku. Kjo do të barazohej thuajse me një qëndrim të shprehur të “Shtetit të Magjistratëve”: Ne s’do analizohemi më – çfarë iku, iku – tani është radha juaj, e “vetingut” tuaj!
