Një stuhi e fuqishme dimërore ka përfshirë pothuajse të gjithë territorin e Shteteve të Bashkuara, duke shkaktuar kaos në transport, ndërprerje të energjisë dhe paralajmërime masive për rrezik ekstrem nga të ftohtit. Mbi 9 mijë fluturime janë anuluar për fundjavën, ndërsa rreth 140 milionë banorë nga New Mexico deri në New England janë vendosur nën alarm zyrtar për stuhi dimërore.
Shërbimi Kombëtar i Motit paralajmëron reshje të dendura bore dhe një brez akulli “katastrofik” nga Teksasi lindor deri në Karolinën e Veriut. Meteorologët thonë se dëmet nga ngricat e rënda mund të rivalizojnë pasojat e një uragani.
Në Teksasin verior, temperaturat e ulëta ekstreme dhe erërat e forta kanë sjellë ndjesi termike deri në -24°C. Në Oklahoma vazhdojnë reshjet e borës, ndërsa në shtetet verilindore pritet që stuhia të sjellё deri në 30 centimetra borë nga Uashingtoni në Nju Jork e Boston.
Në disa zona të shtetit të Nju Jorkut, temperaturat kanë zbritur deri në -34°C, ndërsa në Midwest ndjesia termike ka arritur -40°C, çka sipas mjekëve mund të shkaktojë ngrirje të lëkurës brenda vetëm 10 minutash.
Guvernatorët në më shumë se një duzinë shtetesh kanë shpallur gjendje emergjence ose u kanë kërkuar qytetarëve të mos dalin nga shtëpitë. Guvernatori i Teksasit Greg Abbott njoftoi se rrugët po trajtohen me kripë dhe u bëri thirrje banorëve të qëndrojnë në shtëpi nëse është e mundur.
Sipas platformës FlightAware, mbi 3,300 fluturime janë anuluar ose vonuar të shtunën dhe afro 6,000 të tjera për të dielën. Aeroportet në qytete të mëdha kanë raftet e supermarketeve bosh, ndërsa banorët furnizohen me ushqime dhe bateri.
Kompanitë energjetike janë vënë në gatishmëri, pasi akulli mbi linjat elektrike dhe pemët e ngrira rrezikon të shkaktojë ndërprerje masive të energjisë. Në terren janё vendosur ekipe kërkim-shpëtimi, duke bёrё gati dhe miliona racione ushqimore, qindra mijëra batanije dhe qindra gjeneratorë.
Presidenti Donald Trump deklaroi se administrata e tij po koordinon me autoritetet lokale dhe federale dhe se shërbimet emergjente janë “plotësisht të përgatitura”.
Shkollat në disa qytete janë mbyllur, shërbesat fetare janë zhvendosur online, ndërsa evente kulturore janë anuluar. Në kampuset universitare, studentët kanë zgjedhur të qëndrojnë së bashku për të përballuar stuhinë, edhe pse autoritetet kanë sugjeruar largimin nga konviktet për shkak të rrezikut të ndërprerjes së energjisë.
Pesë vite më parë, një valë e ngjashme e të ftohtit rrëzoi rrjetin energjetik të Teksasit dhe la miliona pa drita për ditë të tëra, me pasoja fatale. Autoritetet thonë se këtë herë janë më të përgatitur — por stuhia ende nuk ka thënë fjalën e fundit.
