Nga kontrasT.al
Protesta e opozitës me pritshmërinë e shembjes së Edi Ramës dhe qeverisë së tij, përfundoi si herët e tjera, pavarësisht pritshmërisë se do ishte ndryshe. Askush nuk mund të thoshte me siguri që ‘RamaDuro” do shembej sot, por entuziasmi ishte i madh… se diçka do ndodhte.
Ndodhi i njëjti skenar, në të njëjtin shesh, me të njëjtin dekor, por me poster më të gjetur – Ramën kokëposhtë. Edhe fonia e qartë, e pastër, dëgjohej pa defekte, edhe njerëzit me telefona ndezur krijuan një pamje të bukur e të civilizuar në shesh. Demokraci!
Pasi folën folësit, u ngjit në podium Sali Berisha. Pa pathosin e zakonshëm, lexoi fjalimin Anti-Rama si me pahir. Në çastin që ai përfundoi dhe kapi flamurin me dorën e djathtë (shenja?) filluan molotovët dhe fishekzjarrët në drejtim të faqes ballore të Kryeministrisë. Muret dhe dera u nxinë tërësisht nga tymi dhe flaka. Tani Kryeministria ishte e “zezë” nga brenda dhe nga jashtë. Fotot filluan të shkrepeshin ndërsa lideri vazhdonte valëviste flamurin derisa e çoi në dorën e majtë atë. Shenja tjetër? Këtu protestuesit tentuan të marrin hov përpara, por policia (me sa duket kishte dijeni) u vërsul menjëherë me Automjetin Ujëhedhës dhe hodhi gaz lotsjellës.
Një spërkatje e gjerë me ujë shpërndau menjëherë “kurajozët” demokratë të radhëve të para dhe gjithë protestuesit në qendrën e protestës. Doktor Berisha u mbrojt nga bodyguardët e tij të shumtë dhe nuk u lejua të laget. Flamur Noka dhe disa të tjerë në ballë të protestës u qullën…
Protestuesit nuk u dorëzuan. Nga Bulevardi kaluan te Parlamenti. Atje filloi lufta me policinë e bërë gardh që hidhte pa asnjë kriter gazin lotsjellës. Policia donte të shkurajonte me gaz çdo iniciativë sado të vogël të mësymjes në drejtim të godinës së ligjvënësve. Dhe ia arriti qëllimit!
Disa incidente me deputetët demokratë, disa të arrestuar krijuan përshtypjen që diçka e madhe do ndodhte, por jo. Protestat me “gaz” të Lulzim Bashës ishin më rezistente dhe të dhunshme se sa kjo.
Të gjithë u tërhoqën me urdhër politik drejt godinës së PD-së. Ora 20:00. Protesta përfundoi si çdo herë këto vitet e fundit. Me të arrestuar nëpër komisariate, me disa policë të plagosur, me njerëz të dëshpëruar që kthehen nëpër shtëpitë e tyre në periferi ose nga qytete të tjera, larg kryeqytetit. Përfundoi me liderin historik që doli në hyrje të godinës së PD-së.
“Do ta hedhim Edi Ramën në Lanë” – tha Sali Berisha, por në fakt u lagën protestuesit dhe ai vetë. Me një ndryshim, që deputetët demokratë do thahen nëpër shtëpitë luksoze e të ngrohta, ndërsa protestuesit e thjeshtë do duhet t’u thahet edhe këtë herë uji policor në lëkurë.
© Ky është shkrim ekskluziv i kontrasT.al, i cili gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar burimin e tij.
