Marrëdhëniet me diferencë të madhe moshe – nuk janë njё fenomen i veҫuar. Por sa herë që një çift i tillë shfaqet në publik, rrjetet sociale dhe mediat shpërthejnë me komente. Dhe sipas psikologes Christine Ma-Kellams, arsyeja është e thjeshtë: këto marrëdhënie nuk perceptohen njësoj për burrat dhe për gratë.
Kur trajneri legjendar i NFL, Bill Belichick, 73 vjeç, shfaqet me partneren e tij 24-vjeçare, kjo shihet si një “arritje”. Ndërsa kur Cher apo Madonna shfaqen me burra shumë më të rinj, reagimi publik është tjetër: më shumë kuriozitet sesa admirim. I njëjti model, por dy lexime krejt të ndryshme.
Sipas autores, ky standard i dyfishtë nuk është thjesht kulturor – por lidhet edhe me mënyrën si shoqëria dhe evolucioni kanë formësuar idenë e “vlerës” në tregun e marrëdhënieve.
Te burrat, vlera romantike shpesh rritet me moshën: më shumë pasuri, status, pushtet dhe siguri. Te gratë, përkundrazi, presioni shoqëror për të ruajtur rininë mbetet i fortë. Prandaj, një burrë i moshuar me partnere të re shihet si dikush që “ia ka dalë”, ndërsa një grua e moshuar me partner të ri rrallë trajtohet si triumf.
Studimet tregojnë se gratë, në përgjithësi, janë të hapura ndaj partnerëve më të vjetër gjatë gjithë jetës, ndërsa burrat ruajnë një preferencë të qëndrueshme për gra më të reja. Ky kombinim krijon një realitet të pabarabartë në mënyrën si gjykohen çiftet me diferencë moshe.
Por autorja thekson edhe diçka tjetër: sot njerëzit nuk janë të detyruar t’i binden skemave biologjike apo pritshmërive shoqërore. Dashuria mund të zgjedhë rrugën e vet, pavarësisht statistikave apo stereotipeve.
Në fund, mes gjithë analizave për “vlerë”, “status” dhe “perceptim publik”, mbetet një e vërtetë e thjeshtë: njerëzit vazhdojnë të dashurohen jashtë rregullave – dhe ndoshta kjo është pjesa më njerëzore e gjithë historisë.
(Burimi: Psychology Today)
