Britania e Madhe po përjeton goditjen më të fortë nga humbja e vendeve të punës si pasojë e Inteligjencës Artificiale, krahasuar me ekonomitë e tjera të mëdha botërore. Një studim i ri i bankës investuese Morgan Stanley tregon se humbjet e vendeve të punës në Mbretërinë e Bashkuar gjatë 12 muajve të fundit kanë qenë dy herë më të larta se mesatarja ndërkombëtare, me një rënie neto prej 8 për qind.
Sipas raportit, kompanitë që kanë futur AI në proceset e tyre të punës pretendojnë se kanë rritur produktivitetin dhe prodhimin, edhe pse me më pak punonjës. Nga pesë ekonomitë kryesore të përfshira në studim, vetëm Shtetet e Bashkuara kanë shënuar rritje të vendeve të punës si rezultat i AI.
Autorët e raportit e cilësojnë këtë situatë si një “sinjal paralajmërues të hershëm” për ndikimin masiv që Inteligjenca Artificiale pritet të ketë mbi fuqinë punëtore në vitet në vijim.
Ky zhvillim vjen në një moment të vështirë për tregun britanik të punës. Papunësia në Mbretërinë e Bashkuar ndodhet aktualisht në nivelin më të lartë të pesë viteve të fundit, sipas të dhënave zyrtare, ndërsa sektorët e tregtisë dhe hotelerisë janë goditur veçanërisht fort.
Një studim tjetër nga platforma e punësimit Adzuna ka treguar se vendet e punës për të rinj – praktikat, pozicionet fillestare dhe vendet për të diplomuar – kanë rënë me gati një të tretën që nga dalja e ChatGPT në vitin 2022. Kjo ka rritur shqetësimin se brezat e rinj do ta kenë gjithnjë e më të vështirë të hyjnë në tregun e punës.
Paralajmërimet po vijnë edhe nga vetë drejtuesit e industrisë së AI. Sam Altman, drejtori ekzekutiv i OpenAI, ka mbështetur idenë e të ardhurës bazë universale si mënyrë për të zbutur pasojat e humbjes së vendeve të punës, por ka pranuar se nuk ekziston një zgjidhje e vetme për këtë sfidë globale.
Ndërkohë, studime të tjera tregojnë se profesionet në rrezik nga AI variojnë nga analistë të të dhënave dhe ekonomistë, deri te historianë dhe autorë – duke dëshmuar se automatizimi nuk kufizohet më vetëm te puna fizike, por prek drejtpërdrejt edhe punën intelektuale.
Kryetari i Bashkisë së Londrës, Sadiq Khan, ka paralajmëruar së fundmi se AI mund të sjellë një epokë të re papunësie masive dhe pabarazie, nëse qeveritë nuk ndërhyjnë me politika mbrojtëse.
Inteligjenca Artificiale po riformëson tregun e punës më shpejt sesa shoqëritë po përgatiten për ta përballuar. Dhe Britania, të paktën deri tani, duket se po e ndjen më fort se të tjerët këtë tronditje.
(Burimi: The Independent)
