Gjykata Kushtetuese pritet të marrë sot vendimin për ankimimin e qeverisë ndaj masës së pezullimit nga detyra të zëvendëskryeministres dhe ministres së Infrastrukturës, Belinda Balluku. Ankesa u paraqit nga Kryeministria pas vendimit të Gjykatës së Posaçme (GJKKO), e cila vendosi pezullimin e saj në kuadër të një hetimi penal në zhvillim.
Seanca dëgjimore u zhvillua më 22 janar, ku palët paraqitën argumentet përballë trupës kushtetuese. Qeveria kërkoi interpretimin e nenit 103 të Kushtetutës, duke pretenduar se anëtarët e Këshillit të Ministrave gëzojnë të njëjtin imunitet si deputetët dhe se pezullimi nga një gjykatë penale cenon balancën e pushteteve.
Nga ana tjetër, SPAK dhe GJKKO mbrojtën masën e pezullimit si instrument procedural të parashikuar nga ligji, i nevojshëm për të shmangur rrezikun e ndikimit mbi hetimin dhe për të mbrojtur interesin publik gjatë procesit penal.
Çështja ka hapur një debat të gjerë institucional dhe juridik mbi atë se deri ku shtrihet mbrojtja kushtetuese e anëtarëve të qeverisë dhe nëse drejtësia penale mund të kufizojë ushtrimin e funksionit ekzekutiv gjatë hetimit.
Vendimi që pritet sot nga Gjykata Kushtetuese nuk do të përcaktojë vetëm fatin e Belinda Ballukut, por edhe standardin e ardhshëm të marrëdhënies mes pushtetit politik dhe drejtësisë në Shqipëri.
