Organizatat ndërkombëtare të të drejtave të njeriut dhe shëndetit riprodhues kanë reaguar ashpër ndaj vendimit të administratës së Presidentit Donald Trump për të zgjeruar politikën e njohur si Mexico City Policy, e quajtur nga kritikët “rregulli i heshtjes globale”.
Politika ndalon financimin amerikan për organizatat që ofrojnë ose mbështesin shërbime aborti, edhe kur ato përdorin fonde të tyre. Tashmë, administrata Trump ka shtrirë kufizimet edhe mbi organizatat që punojnë me çështje të diversitetit, barazisë dhe identitetit gjinor.
Amnesty International e cilësoi vendimin “një sulm ndaj të drejtave të njeriut”, duke paralajmëruar se masa do të godasë më fort gratë dhe komunitetet e margjinalizuara në vendet e varfra, duke kufizuar aksesin në informacion dhe kujdes shëndetësor.
Edhe organizata MSI Reproductive Choices deklaroi se SHBA po “eksporton të njëjtin model kufizimesh që ka vendosur brenda vendit”, duke rrezikuar shërbime jetike për gra dhe vajza në mbarë botën.
Vendimi shoqërohet me ngrirjen dhe rishikimin e fondeve amerikane për ndihmën e huaj, ndërsa marrëveshjet e reja me disa shtete afrikane parashikojnë kushte të reja që, sipas kritikëve, i japin Uashingtonit ndikim të drejtpërdrejtë mbi politikat kombëtare të shëndetit.
Grupet parlamentare demokrate në Kongres e dënuan vendimin duke deklaruar se ndihma amerikane po “përdoret si armë kundër grave dhe komuniteteve LGBT+”.
