Të punosh më mirë natën dhe të flesh vonë është për shumë njerëz stil jete. Por një studim i ri shkencor paralajmëron se ky zakon mund të ketë një kosto të padukshme: shëndetin e zemrës.
Studiues nga Harvard dhe spitali Brigham and Women’s Hospital kanë zbuluar se personat që janë më aktivë në orët e vona të natës kanë, mesatarisht, rrezik më të lartë për infarkt dhe goditje në tru sesa ata që flenë herët dhe zgjohen herët. Sipas tyre, problemi nuk është fakti që dikush është “njeri i natës”, por përplasja mes orës së brendshme biologjike dhe orarit të zakonshëm të jetës – puna, shkolla dhe rutina ditore.
Trupi ynë ka një orë të brendshme që rregullon jo vetëm gjumin, por edhe rrahjet e zemrës, presionin e gjakut, prodhimin e hormoneve dhe mënyrën si përpunojmë ushqimin. Kur kjo orë nuk përputhet me stilin e jetesës, krijohet një lodhje e vazhdueshme dhe zakone jo të shëndetshme bëhen pjesё e rutinёs: pak gjumë, ushqim i çrregullt, më pak lëvizje dhe më shumë duhan.
Për të arritur në këto përfundime, shkencëtarët ndoqën për 14 vjet mbi 300 mijë persona në Britaninë e Madhe. Një pjesë e vogël e tyre e përshkruan veten si njerëz që funksionojnë më mirë natën. Pikërisht ky grup rezultoi me rreth 16 për qind më shumë rrezik për sëmundje të zemrës dhe enëve të gjakut krahasuar me pjesën tjetër të popullsisë. Gratë që kishin këtë ritëm nate shfaqën veçanërisht tregues më të dobët të shëndetit të zemrës.
Ekspertët shpjegojnë se një njeri që fle vonë, por detyrohet të zgjohet herët për punë, nuk pushon sa duhet. Gjithashtu, të hash natën vonë ose të hash mëngjes shumë herët kur trupi ende “mendon” se është natë, e vështirëson metabolizmin. Me kalimin e viteve, këto faktorë grumbullohen dhe ndikojnë drejtpërdrejt në zemër.
Megjithatë, studiuesit theksojnë se situata nuk është pa zgjidhje. Mbajtja e një orari të rregullt gjumi, kujdesi me ushqimin, lëvizja e përditshme dhe shmangia e duhanit janë hapa të thjeshtë që mund të ulin ndjeshëm rrezikun. Nuk kërkohet perfeksion, por qëndrueshmëri në zakone.
Të jesh “njeri i natës” nuk është dënim, por nëse ora jote biologjike bie ndesh me mënyrën si jeton, zemra e paguan e para çmimin.
(Burimi: Associated Press, 28 janar 2026)
