Seriali më i errët dhe më i ndjekur i Netflix viteve të fundit do të rikthehet zyrtarisht. “Wednesday” ka marrë dritën jeshile për sezonin e tretë, por fansat duhet të kenё durim. Prodhimi ende nuk ka nisur, ndërsa kalendari i punës tregon qartë se rikthimi në ekran nuk do të ndodhë para vitit 2027.
Vendimi nuk ishte surprizë, pasi “Wednesday” ka thyer rekorde shikueshmërie. Sezoni i dytë u bë premiera televizive më e madhe e vitit 2025 në platformë, me dhjetëra miliona shikime vetëm në javën e parë dhe me mbi 900 milionë orë të para gjatë tre muajve të parë. Kjo e ka kthyer serialin në një nga prodhimet më të fuqishme të Netflix-it në rang global.
Pas këtij suksesi, ekipi krijues Alfred Gough dhe Miles Millar kanë premtuar se sezoni i tretë do të jetë edhe më ambicioz, më i errët dhe më i thellë emocionalisht. Ata synojnë të zgjerojnë botën e Nevermore dhe të zbulojnë sekrete të reja brenda vetë familjes Addams, duke e çuar historinë drejt kapitullit më të errët të saj.
Sipas planeve të prodhimit, përgatitjet kanë nisur që në muajt e fundit të vitit 2025, ndërsa xhirimet pritet të startojnë më 16 shkurt 2026 në Irlandë, vendi ku u realizua edhe sezoni i dytë. Puna në set parashikohet të zgjasë shumë muaj, gjë që e bën praktikisht të pamundur një premierë gjatë vitit 2026. Burimet pranë prodhimit flasin për një rikthim të mundshëm gjatë verës së vitit 2027.
Nga ana e historisë, finalja e sezonit të dytë ka lënë disa fije të hapura që do të shërbejnë si boshti i sezonit të tretë. Wednesday niset në një udhëtim me xhaxha Fester për të gjetur Enid, e cila mbetet e bllokuar në formën e ujkonjës Alpha. Tyler, i liruar nga Wednesday në një moment mëshire të papritur, mbetet një kërcënim potencial që mund të rikthehet për hakmarrje.
Ndërkohë, një vizion i errët i Ophelias paralajmëron ardhjen e një armiku të ri dhe të rrezikshëm, kësaj here nga brenda trungut familjar.
Pikërisht teze Ophelia do të sjellë edhe një nga emrat më të mëdhenj që i bashkohet kastit: aktorja Eva Green është konfirmuar zyrtarisht për këtë rol, duke shtuar edhe më shumë pritshmëritë për sezonin e ardhshëm. Krahas saj rikthehen Jenna Ortega si Wednesday, Emma Myers si Enid, Hunter Doohan si Tyler, Catherine Zeta-Jones si Morticia, Luis Guzman si Gomez, Fred Armisen si xhaxhai Fester dhe pjesa tjetër e kastit të njohur.
Në sfond, Netflix ka lënë të hapur edhe mundësinë e një seriali spin-off të fokusuar te xhaxha Fester, ndonëse ky projekt mbetet ende në fazë të hershme diskutimesh.
Për momentin, ajo që dihet me siguri është se “Wednesday” nuk është drejt fundit, përkundrazi – universi i saj po zgjerohet, rreziqet po bëhen më personale dhe beteja e ardhshme do të zhvillohet jo vetëm në korridoret e Nevermore, por edhe brenda vetë familjes Addams. Rikthimi është i garantuar. Mbetet tё presim sa e errët do të bëhet historia këtë here…
