Gjykata e Posaçme e Apelit për Korrupsionin dhe Krimin e Organizuar ka vendosur të mos pranojë ankimin e ish-presidentit Ilir Meta, duke lënë në fuqi masën e sigurimit “arrest në burg”.
Vendimi u shpall këtë të premte, më 30 janar 2026, nga gjyqtarja Saida Dollani, e cila shqyrtoi çështjen në trup gjykues monokratik. Ankesa ishte paraqitur kundër vendimit të Gjykatës së Posaçme të Shkallës së Parë, që më 5 janar kishte rrëzuar kërkesën e Metës për zëvendësimin e masës së arrestit me një masë më të lehtë sigurimi.
Me këtë vendim, Apeli i GJKKO-së konfirmon vijimin e paraburgimit për ish-kreun e shtetit, ndërsa mbetet i hapur vetëm rekursi në Gjykatën e Lartë.
Më poshtë, njoftimi i plotë zyrtar i Gjykatës së Posaçme të Apelit për Korrupsionin dhe Krimin e Organizuar:
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Saida Dollani, sot më datë 30.01.2026, shpalli vendimin mbi çështjen penale nr. 37 akti, datë 26.01.2026 regjistrimi, mbi ankimin e ankuesit I.M.: “Ankim kundër vendimit nr. 40/863, datë 05.01.2026, të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Kërkesë për zëvendësimin e masës së sigurimit personal “Arrest në burg” me një masë më të butë sigurimi nga ato që parashikohen në Kodin e Procedurës Penale” në lëndë të masave të sigurimit personal, dhe
vendosi:
– Mospranimin e ankimit të paraqitur nga i pandehuri I.M., nëpërmjet mbrojtësit av. Gylsen Zhllima, ndaj disponimit nr. 863/40, datë 05.01.2026 të Gjykatës së Posaçme të Shkallës së Parë për Korrupsionin dhe Krimin e Organizuar.
– Ky vendim t’i njoftohet palëve.
– Ndaj këtij vendimi mund të bëhet rekurs në Gjykatën e Lartë.
Tiranë, më 30.01.2026.
