Tërheqja nga tregu e një formule qumështi për foshnja ka rikthyer shqetësimin për sigurinë ushqimore të produkteve më të ndjeshme, atyre që përdoren për bebet. Autoriteti Kombëtar i Ushqimit njoftoi se ka urdhëruar tërheqjen e menjëhershme të produktit “Aptamil 1 Pronutra 800g Advanced”, pas një sinjalizimi zyrtar nga Sistemi Europian i Alarmit të Shpejtë për Ushqimin (RASFF), ku gjatë kontrolleve në Gjermani u konstatua prania e substancës cereulide, një toksinë e prodhuar nga bakteri Bacillus cereus.
Produkti i prekur ka datë skadence 10/11/2026 dhe, sipas AKU-së, inspektorët janë angazhuar në terren për verifikimin dhe tërheqjen e plotë të tij nga tregu. Konsumatorëve u është bërë thirrje që, nëse e kanë blerë këtë qumësht, të mos e konsumojnë dhe ta kthejnë në pikat e shitjes.
Por përtej njoftimit zyrtar, rasti i fundit ka hapur një plagë më të thellë: pasigurinë e nënave shqiptare për ushqimin e foshnjave të tyre.
Stafi i redaksisë, pas komunikimeve me konsulentë ushqimorë dhe farmaci në Tiranë, ka mbledhur informacion se qumështi Aptamil, veçanërisht versioni Aptamil 1 Pronutra, përdoret në rreth 95% të rasteve nga nënat shqiptare qё nuk kanё mundёsi tё ushqejnё me gji foshnjat. Ky është qumështi formulë që u jepet bebeve që nga lindja deri në moshën 6 muajshe, një periudhë tepër e ndjeshme për zhvillimin e tyre.
Pikërisht kjo e bën këtë rast veçanërisht shqetësues. Ndryshe nga produkte të tjera ushqimore, ndërrimi i qumështit formulë tek foshnjat nuk është një proces i thjeshtë. Pediatër dhe konsulentë theksojnë se ndryshimi i menjëhershëm i qumështit mund të sjellë shqetësime gastrointestinale, dhimbje barku, refuzim të ushqimit dhe stres si për beben, ashtu edhe për prindërit.
Shumë nëna kanë rrëfyer se informacionin për tërheqjen e produktit nuk e morën fillimisht nga njoftimi zyrtar i AKU-së, por nga mediat, të cilat e shpërndanë lajmin më shpejt dhe më gjerë. Kjo ka rritur edhe më shumë ankthin, pasi në mungesë të udhëzimeve të detajuara, prindërit janë nё dilemё: me çfarë duhet t`i ushqejnё tani foshnjat?
Ky nuk është rasti i parë që produkte ushqimore për bebe tërhiqen nga tregu ndërkombëtar, përfshirë edhe Shqipërinë. Por përsëritja e rasteve, sidomos kur bëhet fjalë për formula qumështi që përdoren masivisht, po kthehet në një burim pasigurie për familjet.
Ndërsa AKU thekson transparencën, përgjegjësinë dhe reagimin e menjëhershëm, realiteti në terren tregon se frika dhe pasiguria janë tashmë të pranishme. Për nënat, shqetësimi nuk lidhet vetëm me një produkt të caktuar, por me faktin se ajo çfarë u ofrohet foshnjave të tyre është e pasigurt.
