Një stuhi dimërore në përforcim të shpejtë, e njohur si “cikloni bombё”, pritet të sjellë reshje të pazakonta bore, erëra shumë të forta dhe përmbytje bregdetare në pjesë të juglindjes dhe mes-Atlantikut të Shteteve të Bashkuara brenda 24 orëve të ardhshme.
Sipas meteorologëve të CNN, ndikimet do të nisin nga mbrëmja e së premtes dhe do të zgjasin gjatë së shtunës, ndёrsa në disa zona bregdetare të Karolinës së Veriut dhe Virxhinias kushtet mund të përshkallëzohen, për shkak të kombinimit të borës së dendur dhe erërave me intensitet uragani.
Stuhia pritet të formohet pranë brigjeve të Karolinës së Veriut dhe të forcohet me shpejtësi teksa lëviz drejt veriut, një proces meteorologjik i njohur si bombogjenezë. Ky zhvillim do të tërheqë masa ajri shumë të ftohta drejt jugut, duke bërë të mundur reshje bore në zona që rrallë përjetojnë mot të tillë dimëror.
Më shumë se 27 milionë persona në juglindje, mes-Atlantik dhe Appalachia janë aktualisht nën paralajmërime për stuhi dimërore, përfshirë pjesë të Karolinës së Veriut dhe Jugut, Virxhinias jugore, Tenesit lindor dhe Kentakit lindor. Shumë prej këtyre zonave po rikuperohen ende nga stuhia vdekjeprurëse e fundjavës së kaluar, e cila shkaktoi ndërprerje të gjata të energjisë dhe probleme serioze në transport.
Reshjet më të mëdha të borës priten në Karolinën e Veriut qendrore dhe lindore, Karolinën e Jugut verilindore dhe Virxhininë jugore, ku parashikohen nga 12 deri në 25 centimetra borë, me mundësi për sasi edhe më të larta në disa zona. Qytete si Kolumbia në Karolinën e Jugut dhe Raleigh në Karolinën e Veriut mund të përjetojnë reshjet më të mëdha të borës ndër vite.
Autoritetet shtetërore kanë nisur përgatitjet, duke trajtuar rrugët dhe paralajmëruar për ndërprerje të mundshme tё fluturimeve.
Përveç borës, erërat pritet të jenë veçanërisht të rrezikshme në zonat bregdetare, pasi mund të arrijnë deri në 120 km/h. Kjo rrit ndjeshëm rrezikun për përmbytje bregdetare, veçanërisht gjatë baticave të larta, sidomos në Outer Banks të Karolinës së Veriut dhe rajonin Tidewater të Virxhinias.
Meteorologët theksojnë se edhe ndryshime të vogla në trajektoren e stuhisë mund të ndryshojnë ndjeshëm ndikimin në zona të caktuara, dhe u bëjnë thirrje qytetarëve të ndjekin njoftimet zyrtare dhe parashikimet lokale.
(Burimi: CNN)
