Ndërron jetë në moshën 82-vjeçare aktori i njohur shqiptar, Fitim Makashi. Aktori prej kohësh vuante nga një sëmundje e rëndë dhe vitet e fundit nga demenca. Fitim Makashi është babai i këngëtarit po aq të njohur shqiptar Redon Makashi.
Fitim Makashi, me rolin e komandant Vasilit tek filmi “Vdekja e Kalit”, bashkë me Timo Fllokon, Raimonda Bulkun dhe Niko Kanxherin hyri në zemrat e publikut shqiptar me figurën e tij artistike të sjellë me mjeshtëri dhe karakter të veçantë.
Jetëshkrimi dhe karriera artistike e Fitim Makashit
Fitim Makashi lindi më 10 prill 1944 në Gjirokastër. Në vitin 1963 nisi studimet në Institutin e Lartë të Arteve në Tiranë për aktor dhe mbaroi në 1967. Për një kohë të gjatë punoi si pedagog në ILA dhe në të njëjtën kohë pati një angazhim të herëpashershëm në Teatrin Popullor (sot Teatri Kombëtar). Zyrtarisht ishte viti 1978 kur u emërua aktor në këtë teatër, vendi ku vazhdoi karrierën artistike si aktor për rreth 12 vjet, saktësisht deri nga mesi i viteve 90-të.
Gjatë kësaj kohe realizoi një sërë rolesh që lanë gjurmë në skenën e teatrit, nga ku kujtojmë rolin e Pedagogut në “Pas provimit të dytë”, Drejtori i fermës në “Ata që duhen”, roli i Benit tek “Vdekja e një komisioneri”, Bedriu tek “Dritat e skenës”, Telhai tek “Besa”, Filipoviç tek shfaqja “Inspektori” që mbahet edhe si roli i fundit i tij në teatër.
Fillimet në film i kishte që në vitin 1967 me një rol episodik të një marinari në filmin “Dueli i heshtur”, duke vazhduar me filmat e tjerë si “Prita” (1968), “Njësiti gueril” (1969), “Ndërgjegjja” (1972), “Rrugicat që kërkonin diell” (1975), “Në fillim të verës” (1975), “Ilegalët” (1976), “Nga mesi i errësirës” (1978), “Intendenti” (1980), “Gjurmë në kaltërsi” (1981), “Tre njerëz me guna” (1985), “Shpella e piratëve” (1991), “Vdekja e kalit” (1992).
Filmografia e Fitim Makashit:
- Vdekja e kalit (1992)
- Shpella e piratëve (1990)
- Tre njerëz me guna (1985)
- Gjurmë në kaltërsi (1981)
- Intendenti (1980)
- Nga mesi i errësirës (1978)
- Ilegalët (1976)
- Në fillim të verës (1975)
- Rrugicat që kërkonin diell (1975)
- Ndërgjegjja (1972)
- Prita (1968)
- Duel i heshtur (1967)
