Mbrëmja e ndarjes së çmimeve Grammy 2026 u shënua nga rekorde dhe momente historike në Los Anxhelos, ku yjet më të mëdhenj të muzikës botërore u ngjitën në skenë për të marrë “gramafonët e artë”.
Fituesi absolut i natës ishte Bad Bunny, i cili rrëmbeu çmimin “Albumi i Vitit” me “Debí Tirar Más Fotos”, duke u bërë albumi i parë në gjuhën spanjolle që fiton këtë trofe prestigjioz. Ai fitoi gjithashtu edhe për albumin më të mirë të muzikës urbane.
Një tjetër protagonist ishte Kendrick Lamar, i cili mori disa çmime, përfshirë albumin më të mirë rap me “GNX” dhe “Regjistrimin e Vitit” për këngën “luther” në bashkëpunim me SZA, duke u bërë reperi më i dekoruar në historinë e Grammy-ve.
Billie Eilish fitoi “Kënga e Vitit” me “Wildflower”, ndërsa Olivia Dean u shpall Artistja e Re më e Mirë.
Në kategoritë pop, Lola Young triumfoi me performancën më të mirë solo pop për “Messy”, ndërsa Cynthia Erivo dhe Ariana Grande fituan për performancën më të mirë pop duo/grup me “Defying Gravity”.
Në zhanret e tjera muzikore:
- Performanca më e mirë rap: “Chains & Whips” – Clipse, Pusha T & Malice ft. Kendrick Lamar & Pharrell Williams
- Albumi më i mirë country bashkëkohor: Jelly Roll – “Beautifully Broken”
- Performanca më e mirë country solo: Chris Stapleton – “Bad As I Used to Be”
- Albumi më i mirë rock: Turnstile – “Never Enough”
- Performanca më e mirë rock: YUNGBLUD – “Changes (Live From Villa Park)”
- Albumi më i mirë R&B: Leon Thomas – “MUTT”
- Performanca më e mirë R&B: Kehlani – “Folded”
Gjithashtu, regjisori legjendar Steven Spielberg fitoi një Grammy për filmin muzikor “Music by John Williams”, duke hyrë në klubin elitë të artistëve EGOT (fitues të Emmy, Grammy, Oscar dhe Tony).
Ceremonia konfirmoi edhe një herë dominimin e emrave të mëdhenj të industrisë, por solli edhe fitore historike që pritet të mbeten gjatë në kujtesën e muzikës botërore.
