Një djalë vetëm 13 vjeç është kthyer në hero pasi notoi për rreth katër orë në kushte të vështira deti për të shpëtuar nënën dhe dy vëllezërit e motrat e tij më të vegjël në Australinë Perëndimore.
Familja po kalonte pushimet në Quindalup, rreth 200 kilometra në jug të Perthit, kur erërat e forta i shtynë dërrasat e tyre të fryra dhe kajakun drejt detit të hapur në Gjirin Geographe, pasditen e së premtes. I vendosur për të kërkuar ndihmë, adoleshenti tentoi fillimisht të arrinte bregun me mjetin lundrues, por pasi ai u përmbyt, u detyrua të vazhdonte duke notuar rreth katër kilometra deri në tokë.
Pasi arriti në breg, ai dha menjëherë alarmin, duke vënë në lëvizje një operacion të gjerë kërkim-shpëtimi ku u përfshinë policia ujore, vullnetarët e shpëtimit detar dhe helikopteri i emergjencave.
Rreth orës 20:30, ekipet e shpëtimit lokalizuan nënën 47-vjeçare, një djalë 12 vjeç dhe një vajzë 8 vjeçe, të cilët po qëndronin të kapur pas një dërrase rreth 14 kilometra larg bregut. Një anije vullnetare i mori në bord dhe të tre u shpëtuan me sukses.
Informacioni i detajuar që dha 13-vjeçari për ngjyrat e pajisjeve lundruese rezultoi vendimtar për gjetjen e tyre. Ai notoi për dy orë me jelekun e shpëtimit dhe më pas e hoqi atë për të vazhduar edhe dy orë të tjera pa të.
Autoritetet e cilësuan ngjarjen një “shpëtim të jashtëzakonshëm”.
Inspektori i policisë James Bradley theksoi se rasti është një kujtesë e fortë se kushtet e oqeanit mund të ndryshojnë shumë shpejt, por nënvizoi se guximi i djalit bëri diferencën.
“Veprimet e tij nuk mund të lavdërohen mjaftueshëm; vendosmëria dhe trimëria e tij shpëtuan jetën e nënës dhe të motrave e vëllezërve,” tha ai.
