Saif al-Islam Gaddafi, djali i ish-liderit libian Muammar Gaddafi, raportohet se ka mbetur i vrarë pas përleshjeve të ashpra mes grupeve të armatosura në zonën e Zintanit. Lajmi është bërë i ditur nga “Al Arabiya”, e cila citon një burim pranë familjes Gaddafi.
Sipas raportimit, katër persona të armatosur e sulmuan rëndë teksa ndodhej në kopshtin e banesës së tij, duke e lënë të plagosur fatalisht përpara se të largoheshin me shpejtësi nga vendngjarja. Burimi shton se përleshjet mes milicive lokale dhe atyre besnike ndaj ish-regjimit të Gaddafit vijuan për disa orë gjatë pasdites në zonën shkretinore të al-Hamada dhe pranë qytetit të Zintanit.
Saif al-Islam shihej si një nga figurat më me ndikim, por edhe më përçarëse në politikën libiane pas rrëzimit të regjimit në vitin 2011. I konsideruar dikur si pasardhës i mundshëm i babait të tij, ai ishte gjithashtu i kërkuar nga Gjykata Ndërkombëtare Penale për akuza mbi krime kundër njerëzimit.
Deri tani nuk ka një konfirmim zyrtar nga autoritetet libiane për ngjarjen, ndërsa situata në zonë mbetet e paqartë.
(Burimi: Al Arabiya / ANSA)
