Të gjithë janë sy e veshë se kur do të dalë “tym i bardhë” nga godina e Gjykatës Kushtetuese me vendimin për çështjen e Ballukut. Por vendimi duket se po “vlon” ende, pa nxjerrë asgjë në dritë, ndërsa tensioni politik rreth drejtësisë vetëm sa po shtohet.
Në këto orë pritjeje nuk ka qenë vetëm kryeministri Edi Rama ai që ka sulmuar sistemin gjyqësor dhe ka dërguar mesazhe drejt gjyqtarëve. Për një balancë sulmesh, sot në skenë doli edhe kreu i Partisë Demokratike, Sali Berisha, me akuza të forta ndaj Gjykatës Kushtetuese.
Gjatë një konference për shtyp, Berisha deklaroi se “Gjykata Kushtetuese është strofulla e fundit e hajdutëve” dhe e akuzoi atë se “zbaton në mënyrë kriminale urdhrat e Edi Ramës”.
“Dita e djeshme faktoi para të gjithë shqiptarëve dhe komunitetit ndërkombëtar se Gjykata Kushtetuese është strofulla e fundit e hajdutëve të narkoshtetit,” u shpreh ai, duke shtuar se gjyqtarët “janë të gatshëm jo të mbrojnë ligjin dhe Kushtetutën, por të shkelmojnë mbi to vetëm për të zbatuar përulësisht urdhrat e Edi Ramës.”
Berisha theksoi se shtyrja e vendimit për herë të tretë është “firmosje e turpit” nga ana e gjykatës dhe e cilësoi situatën si një “degradim të shkallës më të thellë”. Ai shkoi edhe më tej në retorikë, duke thënë se me këto qëndrime “këta e bëjnë Shqipërinë një shtet hor, që nuk ka as ligj dhe as Kushtetutë”.
Mesazhi i liderit demokrat duket se i drejtohet drejtpërdrejt gjyqtarëve në një moment delikat, kur vendimi i shumëpritur mund të ketë pasoja të forta politike. Deklaratat e tij vijnë në një klimë përplasjesh të hapura mes politikës dhe drejtësisë, ku institucionet gjyqësore po gjenden nën presion nga të dy krahët.
Tashmë mbetet për t’u parë se kush nga gjyqtarët do të votojë për Kushtetutën, drejtësinë dhe interesin publik, e kush do të shihet se ka zgjedhur interesin vetjak.
