Bashkëthemeluesi i Microsoft, Bill Gates, ka reaguar pas përfshirjes së emrit të tij në publikimin e fundit të dosjeve voluminoze mbi Jeffrey Epstein, duke deklaruar se pendohet për çdo moment që ka kaluar me financierin e ndjerë.
Në intervistën e tij të parë që nga publikimi i dokumenteve në SHBA, Gates tha për televizionin australian 9News se disa nga mesazhet e përfshira në arkiv janë “të rreme”.
“Penedohem pёr ҫdo minutë që kam kaluar me të, dhe kërkoj falje që e bëra. Ishte budallallëk nga ana ime të shpenzoja kohë me të dhe jam një nga shumë njerëzit që pendohen që e kanë njohur ndonjëherë,” u shpreh ai.
Gates shtoi se, me daljen e mëtejshme të informacioneve, do të bëhet e qartë se takimet me Epstein ishin një gabim, por nuk kishin lidhje me sjellje të paligjshme.
Ndër dokumentet e vitit 2013 të ruajtura në email-in e Epsteinit, përmendet një draft që sugjeron se Gates mund të kishte marrë një infeksion seksual gjatë takimeve me gra të organizuara nga Epstein. Miliarderi i ka hedhur poshtë kategorikisht këto pretendime, duke i cilësuar “absurde”.
“Me sa duket, Jeffrey i kishte shkruar vetes një email që nuk u dërgua kurrë. Ai është i rremë. Nuk e di çfarë synonte – ndoshta të më sulmonte në një farë mënyre,” tha Gates.
Reagimi vjen pasi edhe ish-bashkëshortja e tij, Melinda French Gates, foli për përmendjen e saj në dokumente, duke kujtuar se ajo periudhë e martesës kishte qenë “shumë, shumë e dhimbshme”.
“Por unë kam ecur përpara. E lashë pas dhe vazhdova jetën,” tha ajo për NPR, duke shtuar se ndien “një trishtim të pabesueshëm” kur mendon për vajzat e reja të përfshira në skandal.
Melinda theksoi se ka gjetur një fazë të re dhe të bukur në jetën e saj, ndërsa pyetjet e mbetura duhet të marrin përgjigje nga personat e përfshirë. Çifti u divorcua në maj të vitit 2021, pas 27 vitesh martesë dhe tre fëmijësh.
Publikimi i dosjeve të Epstein vazhdon të trazojë opinionin publik, ndërsa shumë figura të njohura po përballen me pyetje mbi marrëdhëniet e tyre me financierin e dënuar.
