Kryeministri polak Donald Tusk njoftoi se qeveria do të nisë një analizë të thelluar për të verifikuar nëse rrjeti i financierit amerikan Jeffrey Epstein ka shfrytëzuar gra apo vajza polake, si dhe për të shqyrtuar dyshimet mbi lidhje të mundshme me shërbimet ruse të inteligjencës.
Në një video të publikuar në rrjetet sociale, Tusk tha se do të krijohet një ekip i posaçëm analitik për të hetuar nëse fëmijë polakë janë abuzuar përmes rrjeteve kriminale të lidhura me Epstein. “Nuk mund të lejojmë që asnjë rast i abuzimit të fëmijëve polakë nga një rrjet pedofilësh dhe organizatori i këtij rrethi satanik, zoti Epstein, të trajtohet lehtë apo të injorohet,” deklaroi ai.
Kreu i qeverisë shtoi se kanë dalë informacionet e para për persona që dyshohet se e kanë informuar Epsteinin nga Krakovi se kishin tashmë një grup grash ose vajzash polake. Ai paralajmëroi se, nëse shqetësimet konfirmohen, mund të hapet edhe një hetim i plotë penal.
Tusk theksoi gjithashtu nevojën për të sqaruar çdo lidhje të mundshme mes Epsteinit, “rrethit pedofil” dhe shërbimeve speciale ruse, duke e konsideruar çështjen të lidhur drejtpërdrejt me sigurinë kombëtare të Polonisë. Megjithatë, ai nuk dha detaje konkrete mbi këto dyshime.
Deklaratat vijnë pasi Departamenti amerikan i Drejtësisë publikoi rreth tre milionë faqe dokumentesh shtesë mbi çështjen Epstein, që hedhin dritë mbi rrjetin e tij global të kontakteve. Tusk e cilësoi skandalin si një rast “krejtësisht të paprecedentë” dhe tha se materialet e reja përmbajnë edhe “gjurmë polake”.
Ekipi hetimor do të drejtohet nga ministri i Drejtësisë dhe prokurori i përgjithshëm, me pjesëmarrjen e prokurorëve, policisë dhe shërbimeve të sigurisë. Autoritetet nuk përjashtojnë kërkesën për prova shtesë nga SHBA apo nismën për një hetim ndërkombëtar në bashkëpunim me vende të tjera.
Ndërkohë, Rusia ka hedhur poshtë çdo pretendim për lidhje me skandalin. Zëdhënësja e Ministrisë së Jashtme, Maria Zakharova, deklaroi më herët se dokumentet e Epstein tregojnë hipokrizinë e elitave perëndimore që kanë kritikuar Moskën.
(CBS News)
