Kina do të ndalojë përdorimin e dorezave të fshehta të dyerve në të gjitha makinat që shiten në vend, duke u bërë shteti i parë në botë që ndërmerr një hap të tillë për arsye sigurie. Kjo veçori, e bërë e famshme nga Tesla, ka qenë prej vitesh në qendër të kritikave për rrezikun që paraqet në raste aksidentesh.
Dorezat elektrike të fshehta qëndrojnë të sheshta me trupin e makinës dhe aktivizohen me shtypje, ndërsa nga brenda hapen përmes një butoni. Megjithatë, autoritetet kineze thonë se ato mund të jenë të vështira për t’u përdorur dhe ndonjëherë nuk hapen pas një përplasjeje.
Ministria e Industrisë dhe Teknologjisë së Informacionit njoftoi se të gjitha automjetet duhet të kenë një mekanizëm mekanik hapjeje si nga brenda ashtu edhe nga jashtë. Dorezat e jashtme duhet të kenë hapësirë të mjaftueshme për t’u përdorur nga çdokush, ndërsa ato të brendshme duhet të jenë qartësisht të dukshme për pasagjerët.
Rregullorja e re hyn në fuqi më 1 janar 2027 dhe nuk synon një kompani të vetme, megjithëse përveç Teslas, dizajne të ngjashme janë përdorur edhe nga prodhues kinezë si Xiaomi dhe Aion.
Vendimi vjen në një moment kur Tesla përballet me rënie të shitjeve globale dhe konkurrencë të fortë në tregun kinez, i cili është i dyti më i madh për kompaninë. Prodhuesi amerikan kishte njoftuar më herët se po shqyrtonte ridizenjimin e sistemit të hapjes së dyerve pas disa aksidenteve ku pasagjerët raportohej se mbetën të bllokuar në automjete që morën flakë.
Një hetim i Bloomberg identifikoi rreth 140 incidente ku personat mbetën të bllokuar për shkak të problemeve me dorezat, disa prej tyre me pasoja të rënda. Edhe pronarë të tjerë kanë raportuar raste kur u detyruan të thyenin xhamat për të hyrë në makinë pasi nuk mund të hapnin dyert.
Probleme të ngjashme janë raportuar edhe në Kinë. Vitin e kaluar, aksionet e Xiaomi ranë ndjeshëm pas një aksidenti fatal me sedanin e saj, ku mediat lokale përmendën vështirësi në hapjen e derës. Pas ngjarjes, autoritetet shtrënguan gjithashtu rregullat për testimin dhe reklamimin e teknologjive të asistencës së drejtimit.
(CNN)
