Tensionet për projektin e resortit strategjik në Baks-Rrjoll kanë hyrë në një fazë të re përplasjeje, teksa dhjetëra banorë u paraqitën sot fizikisht para dyerve të Prokurorisë së Posaçme (SPAK), në një lëvizje që shkon përtej një kallëzimi formal dhe sinjalizon humbjen e besimit tek ritmi i drejtësisë. Për ta, nuk mjafton më dosja e depozituar prej një viti – ata kërkojnë përgjigje dhe veprim.
Banorët, të shoqëruar nga përfaqësuesit e tyre ligjorë, pretendojnë se po përballen me një grabitje pronash dhe me ndërtime të paligjshme në një sipërfaqe të gjerë toke ku kompania “Gener 2” ka marrë statusin e investitorit strategjik. Sipas tyre, kallëzimi penal fillimisht i depozituar në SPAK është transferuar në prokurorinë e Shkodrës, ndërsa hetimet kanë mbetur pa asnjë zhvillim konkret.
Avokati Ndue Pjetri deklaroi se janë ngritur disa akuza të rënda, nga ndërtimi pa leje te korrupsioni, ushtrimi i ndikimit të paligjshëm dhe falsifikimi i dokumenteve në kuadër të një grupi të strukturuar kriminal. Paralelisht vijon edhe një proces civil për pronësinë e tokave.
Sipas tij, kompania ka vazhduar punimet pa autorizimet përkatëse dhe, në disa raste, ka hyrë në prona me mbështetjen e forcave të policisë. “I kemi njoftuar të gjitha institucionet – IKMT, IMT – por askush nuk ka ardhur të verifikojë dokumentacionin. Ky popull ka thënë që nëse gjithçka është në rregull, largohemi që ditën e parë. Por askush nuk jep sqarime,” u shpreh ai.
Avokati ngriti gjithashtu dyshime mbi mënyrën se si është dhënë statusi strategjik për një nëndegë të shoqërisë, duke e lidhur projektin edhe me ndërtimin e infrastrukturës rrugore në zonë.
Një tjetër pikë e fortë e denoncimit ishte ajo që banorët e quajnë standard i dyfishtë: ndërsa qytetarët ndëshkohen për ndërhyrje minimale në banesat e tyre, një kantier prej rreth 146 hektarësh – sipas tyre – ka operuar pa transparencë dhe pa tabelë informuese deri pas nisjes së protestave.
“Çfarë frike do kishte kompania të negocionte me banorët dhe t’u ofronte përfitime, nëse do të ishte pronare e ligjshme e tokës?” pyeti avokati, duke shtuar se bёhet fjalё pёr pronat e trashëguara prej mbi një shekulli.
Banorët thonë se e shohin SPAK-un si derën e fundit ku mund të trokasin, por skepticizmi i tyre rritet teksa koha kalon. “Nëse vazhdojmë të hetojmë vetëm çështje të vjetra, kur do t’u vijë radha këtyre? Kur resorti të jetë ndërtuar dhe të mos ketë më kthim pas?” paralajmëroi përfaqësuesi ligjor.
Përballë asaj që e perceptojnë si një raport të pabarabartë me pushtetin, banorët e Rrjollit duket se po zgjedhin forma gjithnjë e më të forta reagimi. Dalja e tyre sot para SPAK nuk ishte thjesht protestë – ishte një mesazh se nuk ndihen më të mbrojtur nga procedurat dhe se nuk kanë ndërmend të tërhiqen. Në një betejë që po zhvendoset nga tokat drejt institucioneve, ata kërkojnë një gjë të vetme: drejtësi para se gjithçka të bëhet e pakthyeshme.
