Tri ditë pas fitores historike në tokën serbe, ku kuqezinjtë tronditën Beogradin me suksesin 0-1, Kombëtarja shqiptare dhuroi sërish spektakël në Tiranë. Në një “Air Albania” të mbushur me tifozë, Shqipëria e Sylvinhos përmbysi Jordaninë me rezultatin 4-2, në një ndeshje miqësore që u kthye në festë të madhe.
Edhe pse miqtë arabë kaluan të parët në avantazh me Al-Rashdan në minutën e 27-të, reagimi kuqezi nuk vonoi. Pas disa rasteve të humbura, barazimi erdhi në fundin e pjesës së parë falë një autogoli të Abualnadi pas një aksioni të bukur të Bajramit.
Pjesa e dytë ishte një tjetër histori: Broja, i kthyer me urinë e golit pas dëmtimit të gjatë, shënoi me elegancë për 2-1, më pas Arbër Hoxha goditi me “raketë” nga 25 metra për 3-1, ndërsa Nedim Bajrami vulosi rezultatin 4-1 pas një asistimi perfekt të Brojës. Jordania shkurtoi diferencën në fund, por festa ishte e gjitha kuqezi.
Në këtë mbrëmje u shkrua edhe histori: Elseid Hysaj, me hyrjen e tij në minutën e 78-të, u bë lojtari me më shumë ndeshje për Kombëtaren shqiptare – plot 94 paraqitje, një rekord i merituar për mbrojtësin që prej vitesh mban peshën e brezit të artë kuqezi.
Në tribunë, emocionet ishin të mëdha. Broja foli me gol e asist, Asllani shkëlqeu në mesfushë, ndërsa debutimet e Cakёs dhe Gripshit dhanë sinjale për të ardhmen. Në stol, Sylvinho e shijoi me buzëqeshje fitoren e radhës, duke parë një skuadër që po rritet në besim e personalitet.
Ndërkohë, në sfidat e tjera të grupit, Anglia konfirmoi statusin e saj me fitore të qetë, ndërsa Serbia mori “frymë” me një fitore 1 : 3 në Andorra, pasi e nisi ndeshjen në disavantazh (1:0), duke ndjekur me ankthin e humbjes Shqipërinë, e cila marshon me besim në garën për një vend në play-off, që do t`i hapte rrugën më pas, dy ndeshjeve vendimtare për të arritur eventin – ëndrën – që quhet: World Cup 2026.
Tani gjithçka zhvendoset në nëntor: Andorra, stacioni i radhës për të thënë se shpresa për në Botëror vdes vetëm pas saj.
