Një gjykatë në Britani ka dënuar pesë anëtarë të së njëjtës familje me më shumë se 100 vite burg, pasi u shpallën fajtorë për abuzime të rënda ndaj një vajze të mitur që nisën kur ajo ishte vetëm gjashtë vjeç dhe zgjatën për disa vite.
Sipas asaj që u dëgjua në Hove Crown Court, mes të dënuarve janë babai, gjyshi dhe dy vëllezërit e vajzës, ndërsa nëna u shpall fajtore për vepra të lidhura me keqtrajtimin dhe pengimin e drejtësisë. Për arsye ligjore, identiteti i viktimës dhe i familjarëve nuk është bërë publik.
Gjykata u informua se abuzimet ndodhën në banesën familjare në West Sussex. Vajza, sot adoleshente, tregoi se jetonte me frikë dhe për vite nuk kishte mundur të kërkonte ndihmë. Motra e saj më e vogël rezultoi gjithashtu viktimë e dhunës fizike.
Rasti doli në dritë kur vajza, në moshën 12-vjeçare, i rrëfeu një mësueseje se kishte frikë të kthehej në shtëpi. Më pas ajo njoftoi policinë, duke treguar se abuzimet kishin ndodhur për një periudhë të gjatë.
Para gjykatёs vogёlushja rrёfeu se, kur i tregoi nënës së saj për abuzimin, ajo u rrah, u mbyll në një dollap, iu ngjit goja me shirit dhe e lanё pa ushqim për dy ditë.
Vajza ishte djegur me cigare, ishte rrahur me një kamzhik dhe ishte pështyrë.
Pas hetimeve, babai u shpall fajtor për disa vepra të rënda penale ndaj një të miture nën 13 vjeç, ndërsa gjyshi dhe dy vëllezërit u dënuan për sulme seksuale dhe dhunë. Nëna, e cila kishte mbyllur sytё para dhunёs seksuale tё sё bijёs, u dёnua për keqtrajtim, heqje të paligjshme tё lirisё dhe përpjekje për të penguar drejtësinë.
Autoritetet theksuan se rasti ka pasur një ndikim të thellë te viktimat dhe se prioritet mbetet mbrojtja dhe mirëqenia e tyre. Policia bëri thirrje që publiku të shmangë spekulimet, për të garantuar të drejtën e viktimave për anonimitet.
Organizatat që punojnë kundër dhunës seksuale theksojnë se raste të tilla nënvizojnë rëndësinë e raportimit të hershëm dhe të mbështetjes për viktimat, ndërsa institucionet ligjzbatuese rikujtojnë se mbrojtja e fëmijëve mbetet një prioritet kyç.
(Burimi: Mirror)
