Prokurorët në Dhomat e Specializuara të Kosovës në Hagë kanë kërkuar që ish-presidenti i Kosovës Hashim Thaçi, së bashku me Kadri Veselin, Rexhep Selimin dhe Jakup Krasniqin, të shpallen fajtorë dhe të dënohen me nga 45 vjet burg secili, në përfundim të fazës së deklaratave mbyllëse të një procesi që ka zgjatur gati tre vjet.
Sipas Prokurorisë së Specializuar, të pandehurit kanë vepruar si pjesë e një strukture drejtuese që synonte “të fitonte dhe ushtronte kontroll mbi Kosovën”, duke goditur persona të konsideruar kundërshtarë, bashkëpunëtorë të forcave serbe apo zëra kritikë ndaj UÇK-së. Në sallën e gjyqit u tha se gjatë viteve 1998-1999 dhe menjëherë pas luftës, mbi 100 persona u vranë dhe qindra të tjerë u keqtrajtuan,nё mbi 50 qendra/kampe të ndalimit që lidhen me UÇK-në.
Aktakuza përfshin akuza për përndjekje, vrasje, torturë dhe zhdukje me forcë, ndërsa Prokuroria nënvizon se viktimat nuk kanë qenë vetëm pakica serbe e rome, por – në një pjesë të rasteve – edhe shqiptarë të Kosovës të etiketuar si “kundërshtarë politikë” ose “bashkëpunëtorë”.
Nga ana tjetër, katër të akuzuarit kanë mohuar vazhdimisht përgjegjësinë penale, ndërsa mbrojtja ka këmbëngulur se nuk ka prova të mjaftueshme që ata të kenë pasur kontroll efektiv mbi komandat në terren apo mbi ndalimet dhe abuzimet e raportuara.
Dhomat e Specializuara të Kosovës janë krijuar për të trajtuar krime lufte dhe krime kundër njerëzimit sipas ligjeve të Kosovës, por me staf dhe gjyqtarë ndërkombëtarë. Proceset në Hagë vijojnë të mbeten temë e ndjeshme në Kosovë, ku shumë qytetarë e shohin UÇK-në si forcën që çoi vendin drejt lirisë, ndërsa të tjerë kërkojnë që çdo shkelje e ligjit – pavarësisht palës – të marrë përgjigje në gjykatë.
