Zbulime të reja nga dosjet e Jeffrey Epstein po rikthejnë në qendër të vëmendjes lidhjet e së shkuarës mes financierit dhe figurave të fuqishme amerikane. Një dokument i FBI-së, i publikuar së fundmi, përmban dëshminë e ish-shefit të policisë së Palm Beach, i cili pretendon se Donald Trump e kishte telefonuar në vitin 2006 për ta falënderuar që po hetonte Epstein, duke shtuar se “të gjithë” e dinin për sjelljen e tij.
Sipas përmbledhjes së intervistës së zhvilluar nga FBI në vitin 2019, ish-drejtuesi i policisë – i identifikuar si Michael Reiter – tha se Trump e kishte kontaktuar menjëherë pasi autoritetet nisën hetimet për shfrytëzimin seksual të vajzave të mitura. “Faleminderit Zotit që po e ndaloni, të gjithë e dinë që ai e ka bërë këtë”, mësohet t’i ketë thënë Trump gjatë telefonatës.
Reiter pretendon gjithashtu se Trump kishte dëbuar Epsteinin nga klubi i tij në Mar-a-Lago dhe se “njerëzit në New York e dinin se ai ishte i neveritshëm”. Sipas dokumentit, Trump e kishte përshkruar Ghislaine Maxwell si “operative” të Epstein dhe kishte paralajmëruar policinë që të fokusoheshin tek ajo, duke e quajtur “të keqe”.
Maxwell u dënua në vitin 2021 me 20 vjet burg për rolin e saj në rekrutimin e vajzave të mitura për t’u abuzuar nga Epstein. Këtë javë, ajo dëshmoi virtualisht me dyer të mbyllura para Komitetit të Mbikëqyrjes së Dhomës së Përfaqësuesve, por refuzoi t’u përgjigjej pyetjeve duke u mbrojtur me Amendamentin e Pestë. Avokatët e saj kanë deklaruar se ajo është “e gatshme të flasë plotësisht dhe sinqerisht” vetëm nëse merr një falje presidenciale – një skenar që do të kishte pasoja të mëdha politike.
Vetë Trump ka thënë se nuk ka menduar t’i japë falje Maxwellit.
Presidenti amerikan ka mohuar vazhdimisht çdo shkelje apo dijeni për krimet e Epstein, duke këmbëngulur se kishte ndërprerë kontaktet me të rreth vitit 2004. I pyetur në vitin 2019 nëse kishte pasur ndonjë dyshim për financierin, Trump u përgjigj: “Nuk e kisha idenё. Nuk kam folur me të për shumë, shumë vite.”
Megjithatë, telefonata e pretenduar mund të ngrejë pikëpyetje të reja mbi atë që ai dinte realisht dhe kur. Një zyrtar i Departamentit të Drejtësisë i tha BBC-së se nuk ka prova vërtetuese që presidenti të ketë kontaktuar forcat e rendit dy dekada më parë.
Edhe Shtëpia e Bardhë reagoi me kujdes. Sekretarja e shtypit, Karoline Leavitt, deklaroi se telefonata “mund të ketë ndodhur ose jo”, por theksoi se Trump e kishte përjashtuar Epstein nga Mar-a-Lago sepse “ishte një njeri i çuditshëm”.
Trump dhe Epstein njiheshin prej viteve ’90 dhe janë fotografuar shpesh bashkë, por presidenti ka insistuar se u distancua prej tij shumë kohë përpara arrestimit të parë të financierit. Ai ka pretenduar se konflikti mes tyre nisi kur Epstein tentoi të punësonte staf nga resorti i tij.
Zbulimet e fundit vijnë në një moment kur çështja Epstein po rikthehet fuqishëm në debat publik, ndërsa dëshmia e Maxwell dhe kërkesa e saj e nënkuptuar për falje rrezikojnë të hapin një kapitull të ri me implikime të forta politike dhe ligjore në SHBA.
(Burimi: BBC)
