Brazili ka miratuar një ligj që autorizon varrimin e qenve dhe maceve në faltoret familjare brenda varrezave, duke njohur zyrtarisht lidhjen emocionale mes njerëzve dhe kafshëve të tyre shtëpiake edhe pas vdekjes.
Teksti i ligjit përcakton se varrimet duhet të respektojnë rregulloret shëndetësore dhe mjedisore në fuqi në çdo komunë. Ndërkohë, procedurat operative do të përcaktohen nga shërbimet lokale të varrimit. Edhe varrezat private do të kenë të drejtë të hartojnë rregulloret e tyre, për sa kohë ato janë në përputhje me legjislacionin.
Shpenzimet e varrimit do të mbulohen plotësisht nga pronari i varrit.
Projekti u prezantua nga kongresmeni Eduardo Nóbrega, i cili theksoi se iniciativa synon t’u përgjigjet vështirësive ekonomike me të cilat përballen shumë familje për shkak të kostove shpesh të larta të djegies së kafshëve shtëpiake — një shërbim që për disa mbetet i paarritshëm.
Sipas tij, në këto raste dhimbja për humbjen mund të çojë në varrime të parregullta, duke krijuar rreziqe mjedisore, shëndetësore dhe ligjore.
Me ligjin e ri, pronarët do të kenë mundësinë të zgjedhin varrosjen e kafshëve të tyre në varrin familjar, një zgjidhje që konsiderohet më dinjitoze, më e sigurt dhe në përputhje me rregullat.
“Ligji nuk vendos detyrime, por ofron një alternativë ligjore dhe të rregulluar ndaj djegies së kafshëve shtëpiake”, përfundoi Nóbrega.
(Burimi: ANSA)
