Riviera shqiptare po fiton gjithnjë e më shumë vëmendje ndërkombëtare si një destinacion turistik në rritje, duke u konsideruar një alternativë konkurruese ndaj vendeve tradicionale të Mesdheut. Sipas një artikulli të publikuar në MSN Travel nga gazetarja Samantha Brown, bregdeti shqiptar ofron ujëra kristalore, male që zbresin drejt detit dhe kosto më të përballueshme për turistët.
Artikulli thekson se Riviera shtrihet përgjatë rreth 80 miljeve të vijës bregdetare të Detit Jon dhe, ndonëse krahasohet shpesh me ishujt grekë apo destinacionet kroate, vijon të mbetet më pak e eksploruar. Kjo e bën atë tërheqëse për udhëtarët që kërkojnë bukuri natyrore pa mbipopullimin e zonave turistike më të njohura.
Shqipëria priti mbi 12 milionë vizitorë të huaj gjatë vitit 2025, duke shënuar një rritje prej rreth 86% krahasuar me periudhën para pandemisë dhe rreth 80% më shumë se nivelet e vitit 2019. Sipas vlerësimeve, kjo e rendit vendin ndër destinacionet me rritjen më të shpejtë në botë, ndërkohë që fluksi konsiderohet ende i menaxhueshëm.
Destinacione si Himarë dhe Dhërmi përmenden për plazhet e tyre piktoreske dhe atmosferën më të qetë, pa zhvillimin masiv turistik që karakterizon zona të tjera mesdhetare. Ndërsa përgjatë bregdetit, nga Vlora deri në Sarandë, vizitorët mund të gjejnë ende gjire të izoluara dhe hapësira larg turmave.
Artikulli nënvizon gjithashtu cilësinë e plazheve, ushqimet e detit të freskëta dhe mikpritjen e banorëve vendas, faktorë që po ndikojnë në rritjen e popullaritetit të zonës. Veçanërisht Ksamili, Saranda dhe Dhërmiu po krahasohen me vendpushimet greke dhe kroate, por me çmime dukshëm më të ulëta.
Në një krahasim domethënës, Riviera shqiptare përshkruhet si “Bregdeti Amalfitan i para 30 viteve”, duke sugjeruar një destinacion që po hyn në fazën e tij të artë të zhvillimit turistik.
(Burimi: ATSH)
