Ushtrimet fizike nuk ndikojnë vetëm në forcimin e trupit, por edhe në funksionimin e trurit. Një studim i publikuar në revistën shkencore Neuron dhe i udhëhequr nga Universiteti i Pensilvanisë tregon se aktiviteti i rregullt fizik mund të “riprogramojë” trurin, duke rritur aktivitetin e disa neuroneve që e bëjnë organizmin më të fortë dhe më rezistent.
Hulumtimi u krye mbi minj laboratorikë, tek të cilët shkencëtarët monitoruan aktivitetin nervor gjatë vrapimit. Ata zbuluan një grup neuronesh në hipotalamus – pjesa e trurit që rregullon funksione jetike si energjia dhe metabolizmi – të cilat aktivizohen menjëherë gjatë ushtrimit dhe qëndrojnë aktive për të paktën një orë edhe pasi aktiviteti fizik ka përfunduar.
Pas dy javësh stërvitje të përditshme, minjtë u bënë dukshëm më rezistentë: vraponin më shpejt dhe për një kohë më të gjatë para se të lodheshin. Analiza e trurit të tyre tregoi gjithashtu ndryshime të rëndësishme, pasi neuronet e lidhura me ushtrimet ishin më të shumta dhe më aktive. Kur studiuesit i bllokuan këto qeliza, përmirësimi fizik nuk u vu më re – edhe pse ndërhyrja ndodhi vetëm pas përfundimit të stërvitjes.
Sipas drejtuesit të studimit, Nicholas Betley, mekanizmi nuk është ende plotësisht i qartë, por ka gjasa që këto neurone të ndihmojnë trupin të rikuperohet më shpejt duke përdorur më mirë rezervat e glukozës. Kjo, nga ana tjetër, u mundëson muskujve, zemrës dhe mushkërive të përshtaten gradualisht me ushtrime më intensive.
Autorët shpresojnë që gjetjet të shërbejnë si një nxitje për më shumë aktivitet fizik, sidomos për të moshuarit dhe për personat që janë në rikuperim pas dëmtimeve apo goditjeve në tru. Studimi përforcon idenë se lëvizja e rregullt është një investim jo vetëm për trupin, por edhe për shëndetin e trurit.
(Burimi: ANSA)
