Atmosfera e Lojërave Olimpike dimërore në Milano-Cortina duket se nuk po nxehet vetëm nga garat sportive. Fshatrat Olimpike po përballen me një “krizë” të papritur, pasi prezervativët falas të vënë në dispozicion për atletët pothuajse janë drejt fundit vetëm në mes të eventit.
Zëdhënësi i Komitetit Olimpik Ndërkombëtar (IOC), Mark Adams, konfirmoi se rreth 10 mijë prezervativë janë përdorur nga afro 2,800 sportistë brenda pak ditësh. “Siç thonë ata, zgjedhja është e juaja,” komentoi ai me humor gjatë një konference për shtyp në Ditën e Shën Valentinit, duke iu përgjigjur raportimeve se furnizimet po shterojnë më shpejt se parashikimi.
Fenomeni nuk është i ri për Olimpiadat, ku organizatorët shpërndajnë tradicionalisht prezervativë për të promovuar seksin e sigurt mes atletëve që jetojnë për javë të tëra në të njëjtin kompleks. Sipas skiatores alpine nga Madagaskari, Mialitiana Clerc, kërkesa është gjithmonë e lartë. “Shumë i përdorin, por ka edhe nga ata që i marrin për t’ua dhënë miqve jashtë Lojërave,” tha ajo me sportivitet.
24-vjeçarja kujtoi se edhe gjatë Olimpiadës së Pekinit kutitë me prezervativë boshatiseshin çdo ditë. “Kishte shumë në hyrje të çdo ndërtese ku qëndronim dhe zhdukeshin shpejt,” tregoi ajo.
Përtej medaljeve dhe rekordeve, duket se Lojërat Olimpike mbeten edhe një vend ku krijohen miqësi – dhe ndoshta romanca. Dhe nëse statistikat janë një tregues, “shpirti olimpik” nuk kufizohet vetëm në fushën e sportit.
(Burimi: ANSA)
