Ministri i Jashtëm i Iranit, Abbas Araghchi, është nisur drejt Gjenevës për një raund të ri bisedimesh me Shtetet e Bashkuara, në një përpjekje për të ringjallur negociatat mbi programin bërthamor të Teheranit. Lajmi u konfirmua nga Ministria e Jashtme iraniane, e cila bëri me dije se takimet do të zhvillohen të martën me ndërmjetësimin e Omanit.
Delegacioni iranian përfshin ekspertë diplomatikë dhe teknikë, ndërsa gjatë qëndrimit në Zvicër, Araghchi pritet të takojë edhe zyrtarë zviceranë, përfaqësues të Omanit dhe kreun e Agjencisë Ndërkombëtare për Energjinë Atomike, Rafael Grossi.
Këto bisedime vijnë pas një takimi të parë të mbajtur më 6 shkurt në Muskat dhe disa muaj pasi negociatat u ndërprenë, në sfondin e përshkallëzimit të tensioneve në rajon dhe një fushate bombardimesh izraelite ndaj Iranit vitin e kaluar.
Një nga çështjet më të ndjeshme mbetet fati i mbi 400 kilogramëve uranium të pasuruar deri në 60%, rezervë që sipas inspektorëve bërthamorë është parë për herë të fundit në qershor. Kryeministri izraelit Benjamin Netanyahu ka kërkuar që çdo marrëveshje të përfshijë heqjen totale të uraniumit të pasuruar dhe çmontimin e infrastrukturës që mundëson pasurimin.
Nga ana tjetër, Teherani ka lënë të kuptohet se është i gatshëm për kompromis, por vetëm nëse Uashingtoni heq sanksionet që kanë goditur rëndë ekonominë iraniane. Zëvendësministri i Jashtëm iranian deklaroi se një marrëveshje është e mundur nëse SHBA tregon “sinqeritet”.
Negociatat zhvillohen në një klimë të tensionuar, pasi Uashingtoni ka paralajmëruar edhe mundësinë e veprimit ushtarak dhe ka dërguar një grup aeroplanmbajtës në rajon, ndërkohë që Irani është përballur së fundmi me protesta të brendshme dhe një reagim të ashpër nga autoritetet.
Zvicra vazhdon të luajë një rol kyç në marrëdhëniet diplomatike mes dy vendeve, duke përfaqësuar interesat amerikane në Iran që prej ndërprerjes së marrëdhënieve pas krizës së pengjeve në vitin 1980.
Autoritetet iraniane theksojnë se synojnë një marrëveshje që të sjellë përfitime ekonomike për të dyja palët, veçanërisht në sektorë si aviacioni, minierat dhe energjia. Megjithatë, mbetet e paqartë nëse ky raund bisedimesh do të shënojë një hap real drejt një marrëveshjeje apo thjesht një tjetër përpjekje në një proces të gjatë dhe të ndërlikuar diplomatik.
