Samiti i katërt vjetor për Inteligjencën Artificiale (AI) ka nisur në Nju Delhi, duke mbledhur liderë botërorë dhe drejtues të kompanive më të mëdha të teknologjisë në një ngjarje që për herë të parë zhvillohet në një vend në zhvillim. Kryeministri indian Narendra Modi deklaroi se tema kryesore e këtij viti është “mirëqenia për të gjithë”, ndërsa kërkesa globale për AI po rrit fitimet, por edhe shqetësimet për ndikimin social.
India po përpiqet të tërheqë më shumë investime në këtë industri dhe po shfaqet gjithnjë e më shumë si një qendër e rëndësishme për kompanitë e teknologjisë. Gjigantë si Google, Microsoft dhe Amazon kanë premtuar së bashku rreth 68 miliardë dollarë investime në infrastrukturën e AI dhe cloud deri në vitin 2030.
Autoritetet indiane e shohin “India AI Impact Summit” si një platformë për t’i dhënë më shumë zë vendeve në zhvillim në debatet globale mbi rregullimin e inteligjencës artificiale. Samiti i këtij viti zhvillohet nën tre shtylla kryesore – “njerëzit, përparimi dhe planeti”.
Në mesin e folësve kryesorë janë emra të mëdhenj të teknologjisë botërore, përfshirë CEO-n e Alphabet, Sundar Pichai, drejtuesin e OpenAI, Sam Altman, CEO-n e Anthropic, Dario Amodei, si dhe Demis Hassabis nga Google DeepMind dhe biznesmenin indian Mukesh Ambani. Modi pritet gjithashtu të ndajë skenën me presidentin francez Emmanuel Macron, i cili ndodhet në Indi për një vizitë zyrtare.
Megjithëse India ende nuk ka krijuar një model të fuqishëm global AI që të rivalizojë SHBA-në apo Kinën, strategjia e saj fokusohet te përdorimi masiv i teknologjisë, më shumë sesa te zhvillimi i modeleve bazë. Me mbi 72 milionë përdorues ditorë të ChatGPT deri në fund të vitit 2025, vendi është tashmë tregu më i madh për OpenAI.
Por përhapja e shpejtë e AI po ngre edhe shqetësime serioze për tregun e punës. Sipas bankës së investimeve Jefferies, call-centerat mund të humbasin deri në 50% të të ardhurave deri në vitin 2030 për shkak të automatizimit.
Samiti pritet të tërheqë mbi 250 mijë vizitorë dhe më shumë se 300 ekspozues në një hapësirë gjigante prej 70 mijë metrash katrorë në qendrën e konventave Bharat Mandapam. Fluksi i delegatëve ka bërë që çmimet e hoteleve luksoze në Delhi të rriten ndjeshëm – një suitë që zakonisht kushton rreth 2,200 dollarë nata është listuar së fundmi mbi 33,000 dollarë.
Autoritetet kanë paralajmëruar edhe për trafik të rënduar gjatë javës së samitit, ndërsa Gjykata e Lartë e Indisë ka lejuar avokatët të marrin pjesë në seanca përmes videokonferencës për të shmangur kaosin në qarkullim.
Pas takimeve të mëparshme në Britani, Korenë e Jugut dhe Francë, ky samit synon të balancojë mundësitë ekonomike të inteligjencës artificiale me rreziqet që ajo paraqet – një debat që po bëhet gjithnjë e më vendimtar për ekonominë dhe shoqëritë në mbarë botën.
(Burimi: FRANCE 24, Reuters, AFP)
