Një skemë mashtrimi me biletat që dyshohet se ka funksionuar për rreth një dekadë i ka shkaktuar muzeut më të famshëm në botë, Louvre në Paris, një dëm financiar prej afro 12 milionë dollarësh. Lajmi është konfirmuar nga prokuroria e Parisit, e cila njoftoi arrestimin e nëntë personave, mes tyre dy punonjës të muzeut dhe disa guida turistike.
Sipas hetuesve, rrjeti kriminal ripërdorte të njëjtat bileta për grupe të ndryshme turistësh, duke futur deri në 20 grupe në ditë pa paguar hyrjet e vёrteta. Dyshohet se disa guida kishin korruptuar punonjës të brendshëm për të lehtësuar mashtrimin, ndërsa një pjesë e fitimeve është investuar në pasuri të paluajtshme në Francë dhe Dubai. Deri tani janë sekuestruar mbi 1 milion dollarë cash dhe rreth 500 mijë dollarë në llogari bankare.
Të arrestuarit përballen me akuza të rënda, përfshirë mashtrim në grup të strukturuar, përdorim dokumentesh të falsifikuara, korrupsion dhe pastrim parash. Një prej të dyshuarve është lënë në paraburgim, ndërsa të tjerët janë liruar me masa të rrepta sigurie.
Hetimi nisi pas një kallëzimi që vetë muzeu bëri në dhjetor 2024, kur u ngritën dyshime se disa guida kineze po përdornin të njëjtat bileta disa herë. Gjatë verifikimeve, autoritetet zbuluan se bëhej fjalë për një skemë shumë më të gjerë, e cila mund të jetë shtrirë edhe në Pallatin e Versajës, megjithëse për këtë pistë nuk janë dhënë ende detaje.
Ky skandal është vetëm goditja e fundit për Louvre-in, i cili prej muajsh po përballet me një sërë problemesh serioze. Tetorin e kaluar, muzeu u trondit nga një grabitje spektakolare ku u vodhën bizhuteri mbretërore me vlerë mbi 100 milionë dollarë. Më pas u raportuan edhe dy rrjedhje uji që dëmtuan strukturën e godinës, ndërsa një galeri u mbyll për shkak të dobësive në trarë. Grevat e stafit kanë detyruar gjithashtu mbylljen e pjesshme ose të plotë të muzeut disa herë që nga dhjetori.
Së fundmi, një rrjedhje nga sistemi i ngrohjes dëmtoi edhe një pikturë tavani të shekullit XIX nga artisti Charles Meynier — një tjetër sinjal alarmi për infrastrukturën e vjetëruar të institucionit.
Drejtuesit e muzeut pranuan se po përballen me një “rritje dhe diversifikim të mashtrimeve me bileta” dhe thanë se po bashkëpunojnë me policinë për të forcuar kontrollet dhe për të parandaluar abuzimet.
Ndërkohë, edhe projekti ambicioz i rinovimit “Louvre New Renaissance”, i prezantuar një vit më parë nga presidenti francez Emmanuel Macron, po has pengesa. Plani parashikon lehtësimin e mbipopullimit duke zhvendosur Mona Lizën në një sallë të veçantë, krijimin e një hyrjeje të re dhe restaurimin e infrastrukturës së amortizuar. Por pas grabitjes dhe skandaleve të njëpasnjëshme, projekti dhe drejtuesja e muzeut, Laurence des Cars, janë vënë nën kritika të forta.
Ministrja franceze e Kulturës, Rachida Dati, ka paralajmëruar se vendime të rëndësishme për drejtimin e muzeut do të merren së shpejti.
Skandali i fundit ngre pikëpyetje të mëdha mbi sigurinë dhe menaxhimin e një prej institucioneve kulturore më të vizituara në planet, duke treguar se edhe simbolet botërore të artit nuk janë imunë ndaj korrupsionit dhe mashtrimit.
(Burimi: The New York Times)
