Robert Duvall, një nga aktorët më të mëdhenj të kinemasë amerikane dhe protagonist i disa prej filmave më ikonë të Hollivudit, ka ndërruar jetë në moshën 95-vjeçare. Lajmi u konfirmua nga bashkëshortja e tij, Luciana Duvall, e cila tha se aktori “u nda nga jeta në paqe në shtëpi, i rrethuar nga dashuria dhe ngushëllimi”.
“Për botën ai ishte një aktor, regjisor dhe tregimtar fitues i Oscar-it. Për mua, ai ishte gjithçka,” shkroi ajo, duke shtuar se pasioni i tij për artin ishte i barabartë vetëm me dashurinë për njerëzit dhe jetën.
Duvall la gjurmë të pashlyeshme në historinë e kinemasë me role që u kthyen në referenca për breza të tërë shikuesish. Ai mbahet mend veçanërisht për kolonelin Kilgore në “Apocalypse Now” (1979), ku dha disa nga replikat më të famshme të filmave amerikanë, përfshirë “Më pëlqen era e napalmit në mëngjes”. Po aq i rëndësishëm ishte edhe interpretimi i tij si këshilltari Tom Hagen në dy filmat e parë të “The Godfather”, si dhe roli i Boo Radley në “To Kill a Mockingbird”, që shënoi fillimet e tij në ekran.
Gjatë karrierës së tij u nominua shtatë herë për çmimin Oscar dhe fitoi një herë, në vitin 1984, për rolin në “Tender Mercies”, ku interpretoi një këngëtar country që përpiqej të kapërcente alkoolizmin.
Homazhet nga kolegët nuk munguan. Al Pacino e quajti një “aktor të lindur”, duke shtuar se talenti dhe mirëkuptimi i tij do të kujtohen gjithmonë. Robert De Niro shkroi: “Zoti e bekoftë Bobbyn. U prehtë në paqe.” Ndërsa Jamie Lee Curtis e cilësoi si “këshilltarin më të madh që ekrani ka parë ndonjëherë”, në referencë të rolit të tij në “Kumbari”. Adam Sandler e përshkroi si “një nga aktorët më të mëdhenj që kemi pasur ndonjëherë”.
I lindur në San Diego në vitin 1931, djali i një oficeri detar, Duvall studioi dramë në St. Louis dhe më pas në Neighborhood Playhouse në Nju Jork, ku ishte bashkëstudent me emra që më vonë do të bëheshin legjenda, si Dustin Hoffman dhe Gene Hackman. Ai punoi fillimisht në teatër dhe televizion, ndërsa roli i Boo Radley në vitin 1962 e vendosi përfundimisht në hartën e kinemasë.
Reputacioni i tij u forcua me paraqitje në filma si “Bullitt”, “True Grit” dhe “MAS*H”, ndërsa më vonë u bë pjesë e valës së re të Hollivudit me “THX 1138” dhe bashkëpunimet me Francis Ford Coppola. Edhe pse fitoi Oscar-in, shpesh u shqua si një aktor karakteri me prani të fortë, duke u shfaqur në dhjetëra filma gjatë viteve ’80 dhe ’90, nga “Network” te “Days of Thunder” dhe “The Natural”.
Ai provoi edhe regjinë me filmin “Angelo My Love” (1983) dhe më pas me “The Apostle” (1997), rol që i solli një tjetër nominim për Oscar. Në vitet e mëvonshme drejtoi edhe “Assassination Tango” dhe western-in “Wild Horses”, ndërsa vazhdoi të ishte aktiv në ekran deri në dekadën e fundit të jetës. Në vitin 2015 u nominua sërish për Oscar për “The Judge”, duke u bërë aktori mashkull më i vjetër i nominuar në atë kohë.
Përtej aktrimit, Duvall njihej si një mbështetës i kahershëm i republikanëve, megjithëse deklaroi se u tërhoq nga partia në vitin 2014.
Në jetën personale, ai u martua katër herë dhe që nga viti 2005 ishte i martuar me Luciana Pedraza. Çifti nuk pati fëmijë.
Me një karrierë që shtrihet në më shumë se gjashtë dekada, Robert Duvall mbetet një figurë monumentale e artit filmik. Rolet e tij, të ndërtuara me thellësi dhe ndjeshmëri, i dhanë zë shpirtit njerëzor dhe do të vazhdojnë të jetojnë në ekran edhe për brezat që do të vijnë.
