Gjashtë kompani të lidhura me Sarah Ferguson, ish-bashkëshortja e princit Andrew Mountbatten-Windsor, janë në proces mbylljeje pasi dolën në dritë detaje të reja mbi marrëdhënien e saj me financierin e ndjerë Jeffrey Epstein.
Sipas regjistrit zyrtar britanik të bizneseve, Companies House, kërkesat për çaktivizimin e secilës prej kompanive u dorëzuan pasi miliona dokumente të publikuara nga autoritetet amerikane zbuluan komunikime dhe kontakte të mëparshme mes Fergusonit dhe Epstein. Ferguson, 66 vjeç, rezulton të ketë qenë drejtoreshë e vetme e gjashtë kompanive: S Phoenix Events, Fergie’s Farm, La Luna Investments, Solamoon Ltd, Philanthrapreneur Ltd dhe Planet Partners Productions Ltd.
Në dokumentet e bëra publike muajin e kaluar, ish-dukesha duket se i shkruan Epsteinit: “Jam në shërbimin tënd. Thjesht martohu me mua.” Në një tjetër shkëmbim email-esh të datës 21 shtator 2011, ajo i dërgon urime për lindjen e djalit, duke theksuar se mbetej “me dashuri dhe miqësi”. Një mesazh tjetër lë të kuptohet se Ferguson ishte ndjerë e lënduar, pasi mendonte se Epstein ishte afruar me të vetëm për të krijuar lidhje me princin Andrew.
Një pjesë e këtyre komunikimeve daton pas vitit 2008, kur Epstein ishte dënuar për përfshirje në prostitucion me të mitur. Dokumentet tregojnë gjithashtu se në vitin 2009 Ferguson e falënderonte atë duke e quajtur “vëllai që gjithmonë kam dashur”, ndërsa në vitin 2011 i kërkoi falje “me përulësi” një muaj pasi e kishte mohuar publikisht si mik.
Pas publikimeve, ndikimi ka qenë i menjëhershëm edhe në aktivitetet e saj bamirëse. Organizata Sarah’s Trust njoftoi se do të mbyllet “për një të ardhme të parashikueshme”, ndërsa shtatë organizata të tjera, përfshirë Teenage Cancer Trust, ndërprenë bashkëpunimin dhe i hoqën patronazhin Fergusonit.
Ndërkohë, publikimi i një libri të ri të saj u anulua vjeshtën e kaluar, çka çoi në tërheqjen nga tregu të mijëra kopjeve. Zhvillimet vijnë në një kohë kur vëmendja publike ndaj dosjeve Epstein vijon të rritet, duke përfshirë emra të njohur dhe duke sjellë pasoja të drejtpërdrejta në reputacionin dhe aktivitetet e tyre profesionale.
