Vepra e dramaturgut të njohur francez Florian Zeller, e njohur fillimisht me titullin “Le Père”, vjen për publikun shqiptar për të disatën herë në një realizim të ndjerë dhe emocional.
Autor: Florian Zeller
Përkthimi: Adriana Tolka
Regjia: Erson Zymberi
Me aktorët:
Viktor Zhusti, Egla Ceno, Pjerin Vlashi, Linda Jarani, Adriana Tolka
“Babai” është një dramë tronditëse që eksploron fragmentimin e kujtesës dhe humbjen graduale të orientimit në realitet. Në qendër të saj është André, një burrë në moshë që përballet me shpërbërjen e botës së tij të brendshme, ndërsa vajza e tij, Ana, përpiqet me përkushtim ta mbajë të lidhur me realitetin që ai po e humb dita-ditës.
E njohur ndërkombëtarisht si “Le Père”, kjo vepër ka pushtuar skenat më të rëndësishme teatrore dhe ka prekur miliona spektatorë me ndjeshmërinë dhe fuqinë e saj dramatike. Zeller ndërton një strukturë dramaturgjike të pazakontë, ku publiku përjeton botën përmes syve të protagonistit, duke ndarë konfuzionin, frikën dhe pasigurinë e tij. Realiteti thyhet, koha bëhet e paqëndrueshme dhe hapësira skenike shndërrohet në një labirint emocional.
Kjo tragjikomedi intime na vendos përballë një përvoje universale: plakjes, demencës dhe lidhjes së brishtë mes babait dhe bijës. Është një dramë mbi kujdesin dhe përgjegjësinë, mbi dinjitetin që lufton të mbijetojë edhe kur kujtesa venitet, dhe mbi dashurinë që mbetet si dritë e fundit në errësirën e harresës.
“Babai” nuk është vetëm një histori mbi sëmundjen. Është një dramë thellësisht njerëzore mbi identitetin, frikën e humbjes së vetes dhe mbi marrëdhëniet që na përkufizojnë. Një shfaqje që prek zemrën, sfidon perceptimin dhe fton publikun në reflektim të thellë mbi jetën dhe kohën.
