Dokumentee e publikuara nga Departamenti amerikan i Drejtësisë tregojnë se financierit të ndjerë dhe të dënuar për abuzime seksuale, Jeffrey Epstein, i ishte ofruar mundësia të investonte në prona të ndjeshme qeveritare në Shtetet e Bashkuara, përfshirë një kompleks pranë Pentagonit dhe dy zyra rajonale të FBI-së.
Sipas ITV News në Mbretërinë e Bashkuar, email-e të përfshira në dosjet e reja tregojnë se në vitin 2016 Epsteinit iu paraqit një ofertë për të blerë pjesë në një kompleks prej 84,710 metrash katrorë, rreth 1.6 kilometra larg Pentagonit, në Arlington të Virxhinias. Në dokumentet e investimit, prona përshkruhej si “vend kritik për misionin” dhe si “e vetmja pronë në Arlington, përveç vetë Pentagonit, që mund të përmbushë nevojat e hapësirës dhe infrastrukturës së Departamentit të Mbrojtjes”.
Çmimi i propozuar për blerjen ishte rreth 116 milionë dollarë. Sipas strukturës së parashikuar të marrëveshjes, Epstein do të bëhej bashkëpronar dhe, praktikisht, qiradhënës i qeverisë amerikane. Nuk ka prova që transaksioni të jetë realizuar, por vetë ideja që një person i dënuar për krime seksuale të kishte aksione në një pronë që i shërben Pentagonit ka ngritur pikëpyetje serioze sigurie.
Në mesin e miliona email-eve të publikuara muajin e kaluar, një informator i FBI-së shkruan në një memo se Epstein ishte “agjent i Mossadit”, shërbimit izraelit të zbulimit jashtë vendit. “Epstein ishte i afërt me ish-kryeministrin e Izraelit, Ehud Barak, dhe ishte trajnuar si spiun nën drejtimin e tij”, thuhet në memo.
Epstein kishte një marrëdhënie të gjatë me Ehud Barak, i cili e vizitoi mbi 30 herë në shtëpinë e tij në Nju Jork midis viteve 2013 dhe 2017. Dokumentet e publikuara hedhin dritë edhe mbi mbështetjen financiare të Epstein për organizata izraelite, përfshirë “Friends of the Israeli Army” dhe Fondin Kombëtar Hebraik, si dhe mbi lidhjet e tij të supozuara me Mossadin.
Oferta për kompleksin pranë Pentagonit ishte pjesë e tre dokumenteve – një email, një prezantim për investitorë dhe një përmbledhje marrëveshjeje – të përfshira në dosjet e reja.
Propozimi iu dërgua Epsteinit nga David Stern, një biznesmen që e quante veten “ushtari” i tij. Stern shërbeu gjithashtu si këshilltar i afërt i Andrew Mountbatten-Windsor.
Në të njëjtin vit kur Stern përcolli ofertën për kompleksin pranë Pentagonit, ai u bë drejtor i St George’s House Trust në Kështjellën Windsor dhe mori pjesë në një aktivitet në Pallatin St James, ku u ul pranë Mbretëreshës së ndjerë Elizabeth II.
Stern i dërgoi gjithashtu Epsteinit në vitin 2015 një propozim të veçantë për të investuar në dy zyra të FBI-së në Richmond dhe Baltimore, si dhe në gjykata federale, të cilat përshkruheshin si “asete tërheqëse”. Marrëveshja kërkonte një investim fillestar prej 25 milionë dollarësh dhe 80 milionë dollarë të tjerë më pas, me pronësinë të kanalizuar përmes një entiteti jashtë vendit në Ishujt Kajman.
Të dy propozimet për pronat ishin iniciuar nga investitori i pasurive të paluajtshme Jonathan D. Fascitelli.
Publikimi i dokumenteve ka shtuar vëmendjen mbi rrjetin e marrëdhënieve të Epstein me figura politike dhe biznesi, si dhe mbi përmasat e ndikimit të tij në qarqe të larta ndërkombëtare.
(Burimi: Al Jazeera)
