Këshilli për Rregulloren, Mandatet dhe Imunitetin mblidhet sot në orën 10:00 në sallën “Pjetër Arbnori”, për të vijuar shqyrtimin e kërkesës së Prokurorisë së Posaçme për autorizimin e Kuvendit lidhur me masën e sigurisë ndaj zëvendëskryeministres dhe ministres Belinda Balluku.
Mbledhja e sotme konsiderohet vendimtare, pasi pritet të qartësohet nëse Këshilli do t’i hapë rrugë kalimit të çështjes për votim në seancë plenare për heqjen e imunitetit, apo nëse procedura do të zvarritet sërish me kërkesa shtesë, diskutime apo shtyrje afatesh.
Nëse Këshilli vendos t’ia kalojë çështjen seancës plenare, atëherë do të jetë Kuvendi që do të marrë vendimin final për autorizimin ose jo të kërkesës së SPAK-ut. Në të kundërt, çdo shtyrje do të interpretohet si një sinjal i ri politik mbi mënyrën se si mazhoranca po e trajton këtë procedurë.
Po sot, në orën 11:00, Komisioni për Evropën dhe Punët e Jashtme zhvillon seancë dëgjimore me dy kandidatë për poste të rëndësishme diplomatike.
Jeta Kreka propozohet për Ambasadore të Jashtëzakonshme dhe Fuqiplotë të Republikës së Shqipërisë në Katar, një vend me peshë në marrëdhëniet energjetike dhe ekonomike.
Ndërsa më e ndjeshme politikisht është kandidatura e Bardhyl Kollçakut për Ambasador në NATO. Ish-shef i Shtabit të Përgjithshëm dhe ish-deputet, ai propozohet për një nga postet më strategjike të diplomacisë shqiptare, në një moment kur Shqipëria është anëtare aktive e Aleancës dhe përballet me sfida të sigurisë në rajon.
Kandidatura e tij pritet të shoqërohet me debat, jo vetëm për profilin ushtarak dhe politik, por edhe për faktin se emri i tij është përmendur në hetime të nisura nga SPAK për çështjet e administrimit dhe tjetёrsimit tё pronave tё ushtrisё.
Në pak orë, dy procese paralele — një për një ministre në detyrë dhe një tjetër për një kandidat ambasadori në NATO — do të japin sinjale të qarta për klimën politike dhe standardin e përgjegjshmërisë institucionale. Sot mbetet për t’u parë nëse Kuvendi do të përshpejtojë vendimmarrjen apo do të zgjedhë sërish rrugën e pritjes…
