Pak javë para arrestimit të tij për trafikim seksual, Jeffrey Epstein po përpiqej të siguronte një strehë luksoze në Marok – një pallat madhështor pranë Marrakeshit, qё do tё blihej përmes një rrjeti kompanish offshore në Ishujt e Virgjër Britanikë dhe Lihtenshtajn.
Dokumentet e publikuara nga Departamenti amerikan i Drejtësisë tregojnë se në muajt e parë të vitit 2019, ndërsa hetimet federale po intensifikoheshin, Epstein ishte në negociata për të blerë pronën “Bin Ennakhil” – një kompleks 4.6 hektarë me 60 shatërvanë mermeri, kopshte me mijëra palma dhe ambiente luksoze të izoluara nga sytë e publikut.
Më 4 korrik 2019, vetëm dy ditë para arrestimit në aeroportin Teterboro në Nju Xhersi, u paraqit një kërkesë për transfertë bankare me firmën e tij për rreth 14.95 milionë dollarë. Por transferimi nuk u realizua.
Struktura offshore dhe bankat që u tërhoqën
Sipas dokumenteve, blerja nuk ishte konceptuar si një transaksion i drejtpërdrejtë. Plani përfshinte blerjen e aksioneve të një kompanie në Lihtenshtajn, e lidhur me pronën përmes një trusti në Ishujt e Virgjër Britanikë. Çmimi i diskutuar ishte rreth 25 milionë euro.
Negociatat u menaxhuan nga Karyna Shuliak, e konsideruar në media si partnere e Epstein dhe bashkëpunëtore në bizneset e tij.
Por ndërkohë që presioni publik dhe mediatik po rritej, bankat nisën të refuzonin transfertat. Një pagesë e lidhur me llogaritë e tij u shënua si “Refuzuar” nga Deutsche Bank në mars 2019. Më pas, përmes Charles Schwab, u tentua një transfertë prej mbi 11 milionë eurosh drejt një llogarie në Zvicër, e cila u anulua një ditë më vonë.
Sipas raportimeve, ishin bankat qё ngritën shqetësime për rrezikun e arratisjes, në një kohë kur Epstein kërkonte lirimin me kusht me garanci 100 milionë dollarë.
Maroku në orbitën e tij
Maroku nuk ishte një destinacion i ri për Epstein. Dokumente të mëparshme tregojnë se që në vitet 2000 kishte komunikime që përfshinin rekrutime vajzash nga Marrakeshi. Kjo e bën edhe më domethënëse përpjekjen për të blerë një pronë në një vend që nuk ka traktat ekstradimi me SHBA-në.
Në verën e vitit 2019, ndërsa përpjekjet financiare po dështonin dhe sistemi bankar po mbyllte rrugët e tij, Epstein u arrestua për trafikim të të miturve.
Pallati maroken me shatërvanë dhe oborre me mozaik nuk u bë kurrë strehë për të. Por dokumentet tregojnë se, deri në ditët e fundit para arrestimit, ai po kërkonte një dalje – financiare dhe gjeografike – nga rrjeti ligjor që po shtrëngohej rreth tij.
(Burimi: Al Jazeera / Reuters)
