Fjalimi i Presidentit Donald Trump për “Gjendjen e Kombit” u prit kryesisht pozitivisht nga audienca që e ndoqi drejtpërdrejt, sipas një sondazhi të CNN të realizuar nga SSRS. Megjithatë, edhe mes një publiku të prirur politikisht drejt tij, shumë shikues mbetën të pavendosur nëse ai do të arrijë të ulë realisht koston e jetesës.
Gati dy të tretat e atyre që e ndoqën fjalimin thanë se patën të paktën një reagim disi pozitiv, ndërsa 38% e cilësuan reagimin e tyre si shumë pozitiv. Megjithatë, kjo pritje ishte disi më e ftohtë krahasuar me fjalimin e tij në Kongres vitin e kaluar dhe më e ulët se vlerësimet që ai mori gjatë mandatit të parë. Ajo është e ngjashme me vlerësimet që kishte ish-Presidenti Joe Biden në vitin e tij të fundit në detyrë.
Sipas CNN, reagimet pozitive janë tipike për fjalimet presidenciale në Kongres, pasi ato zakonisht ndiqen nga audienca që përputhet politikisht me presidentin. Në këtë rast, publiku që ndoqi fjalimin ishte rreth 13 pikë përqindjeje më shumë republikan se sa përbërja e përgjithshme e elektoratit amerikan.
Fjalimi duket se ndikoi disi në perceptimin e atyre që e ndoqën. Para fjalimit, 54% besonin se politikat e Trump do ta çonin vendin në drejtimin e duhur; pas tij, kjo shifër u rrit në 64%. Ndërkohë, përqindja e atyre që mendonin se ai kishte prioritetet e duhura u rrit nga 44% në 54%.
Megjithatë, ekonomia dhe kostoja e jetesës mbetën pika më e ndjeshme. Para fjalimit, shumica e shikuesve thanë se donin ta dëgjonin Trump të fliste më shumë për këto çështje. Pas fjalimit, 45% e audiencës menduan se ai kishte folur shumë pak për koston e jetesës, ndërsa 53% thanë se i kishte kushtuar vëmendjen e duhur.
Kur u pyetën për besimin tek presidenti për ta bërë jetesën më të përballueshme, vetëm 31% thanë se kishin shumë besim, 29% shprehën një farë besimi, ndërsa 40% deklaruan se nuk kishin aspak besim.
Audienca ishte pothuajse e ndarë në mënyrë të barabartë mbi përdorimin e tarifave: një pjesë e konsideroi si një përdorim të përshtatshëm të pushtetit, ndërsa të tjerë si një tejkalim të kompetencave.
Pas fjalimit, 62% e shikuesve thanë se politikat e tij ekonomike dhe ato mbi imigracionin do ta çonin vendin në drejtimin e duhur. Ndërsa vlerësimi për ekonominë mbetet i njëjtë me atë të vitit të kaluar, mbështetja për politikat e emigracionit ka rënë krahasuar me nivelet e mandatit të parë. Mes atyre që ishin të pakënaqur me fokusin mbi emigracionin, 38% mendonin se ai kishte folur shumë për këtë çështje, ndërsa vetëm 6% mendonin se kishte folur shumë pak.
Në aspektin e lidershipit, 45% e shikuesve thanë se kishin shumë besim tek Trump për të siguruar drejtim të fortë për vendin. 43% shprehën shumë besim për përdorimin e përgjegjshëm të fuqisë ushtarake amerikane, ndërsa 38% thanë se kishin shumë besim tek ai për vendimet lidhur me Iranin.
Megjithatë, historia sugjeron se fjalimet për “Gjendjen e Kombit” rrallë ndikojnë ndjeshëm në vlerësimet e përgjithshme të presidentit. Në një sondazh të CNN të realizuar disa ditë para fjalimit, miratimi i Trump mes publikut të gjerë ishte 36%.
Sondazhi u realizua me 482 të rritur amerikanë që thanë se e kishin ndjekur fjalimin. Ata u përzgjodhën nga Paneli i Opinionit SSRS, një panel përfaqësues kombëtar i rekrutuar përmes teknikave probabilitare. Marzhi i gabimit për këtë mostër është plus/minus 5.5 pikë përqindjeje.
(Burimi: BBC, CNN)
