Katër persona humbën jetën pasi forcat kubane të rojes kufitare qëlluan ndaj një motoskafi të regjistruar në Florida, i cili, sipas autoriteteve në Havana, po përpiqej të “infiltrohej” nё territorin e ishullit me qëllime terroriste. Incidenti ndodhi në Falcones Cay, në provincën Villa Clara, rreth 100 milje nga brigjet e Floridës, në një moment tensionesh të larta mes Kubës dhe Shteteve të Bashkuara.
Sipas Ministrisë së Brendshme kubane, patrullat detare iu afruan anijes për ta identifikuar pasi ajo hyri në ujërat territoriale të vendit. Gjatë ndërhyrjes, një nga pasagjerët e motoskafit hapi zjarr ndaj forcave kubane, duke plagosur komandantin e mjetit të rojes kufitare. Forcat kubane u kundërpërgjigjën me zjarr, duke vrarë katër persona.
Gjashtë të tjerë mbetën të plagosur dhe po marrin ndihmë mjekësore, ndërsa janë vendosur në paraburgim. Autoritetet kubane thanë se pasagjerët ishin kubanë që jetojnë në SHBA dhe se në bord u sekuestruan armë zjarri, përfshirë pushkë sulmi, pistoleta, kokteje Molotov, eksplozivë të prodhuar në shtëpi, jelekë antiplumb, dylbi dhe uniforma kamuflazh.
Sipas “deklaratave paraprake” të të mbijetuarve, grupi kishte si objektiv një “infiltrim për qëllime terroriste”. Dy prej tyre, sipas Ministrisë së Brendshme, kërkoheshin më parë nga autoritetet kubane për terrorizëm. Një tjetër person, i cili dyshohet se ishte dërguar nga SHBA për të lehtësuar pritjen e grupit të armatosur, është arrestuar dhe, sipas deklaratës, ka pranuar fajin.
Faqja zyrtare Cubadebate publikoi emrat e shtatë personave të identifikuar deri më tani, mes tyre Michel Ortega Casanova, i cili mbeti i vrarë gjatë operacionit. Tre viktimat e tjera janë ende në proces identifikimi.
Numri i regjistrimit i motoskafit, FL7726SH, përputhet me një mjet motorik 24 metra të gjatë, i prodhuar në vitin 1981, sipas të dhënave të bazës detare amerikane.
Ngjarja ka shkaktuar reagime të forta në SHBA. Sekretari i Shtetit Marco Rubio tha se ambasada amerikane në Havana po heton incidentin dhe se Uashingtoni do të reagojë sapo të sqarohen plotësisht rrethanat. Zëvendëspresidenti JD Vance deklaroi se administrata po e monitoron situatën, por theksoi se detajet mbeten të pakta.
Zyrtarë nga Florida kërkuan një hetim të plotë dhe mbajtjen përgjegjëse të qeverisë kubane. Prokurori i Përgjithshëm i Floridës, James Uthmeier, tha se ka udhëzuar nisjen e një hetimi në bashkëpunim me autoritetet federale. Kongresmeni Carlos A. Gimenez kërkoi të përcaktohet nëse ndonjë nga viktimat ishte shtetas amerikan apo banor i ligjshëm, ndërsa senatori Rick Scott e quajti incidentin “thellësisht shqetësues”.
Ngjarja vjen në një klimë tensioni të shtuar mes dy vendeve, pasi SHBA ka bllokuar pothuajse të gjitha dërgesat e naftës drejt Kubës, duke përkeqësuar krizën ekonomike në ishull. Ndërkohë, autoritetet kubane e paraqesin incidentin si një operacion kundër një grupi të armatosur me objektiva destabilizuese.
Hetimet janë në vijim, ndërsa mbetet për t’u parë nëse përplasja do të thellojë më tej marrëdhëniet tashmë të brishta mes Havanës dhe Uashingtonit.
(Burimi: CNN, ANSA)
