Protesta e sotme e Partisë Demokratike ka ndjekur një skenar krejt ndryshe nga tubimet e zakonshme politike. Pa podium, pa fjalime të gjata dhe pa qëndrime statike në një shesh të vetëm, mbështetësit e opozitës marshuan për më shumë se tre orë nëpër rrugët kryesore të Tiranës, duke ndryshuar vazhdimisht itinerarin dhe duke e kthyer protestën në një lëvizje të vazhdueshme presioni në terren.
Strategjia e re dukej e qartë: konsumim i gjatë i hapësirës publike, lëvizje e shpejtë dhe zhvendosje e vazhdueshme, duke e vënë në vështirësi policinë për të kontrolluar turmën.
Forcat e rendit shoqëruan nga afër marshimin, ndërsa tensioni u rrit gradualisht në orët e mbrëmjes, kur protesta u drejtua drejt zonës së ish-Bllokut.
Momenti më i fortë simbolik ndodhi pranë vilës së ish-diktatorit Enver Hoxha. Drejt godinës u hodhën molotovë dhe fishekzjarrë, ndërsa pas hedhjes së tyre u krijuan disa vatra zjarri që dolën përkohësisht jashtë kontrollit. Flakët u përhapën në pjesë të fasadës dhe oborrit, duke detyruar ndërhyrjen e menjëhershme të policisë dhe zjarrfikësve. Autoboti me ujë ndërhyri me presion për të shuar zjarrin, ndërsa zona u rrethua nga forca të shumta policie.
Aktivistë dhe mbështetës të PD-së e konsideruan aktin si një “mesazh simbolik” kundër asaj që e quajnë rikthim të mentalitetit autoritar në qeverisje. Për opozitën, vila e Enver Hoxhës përfaqëson një epokë të errët që, sipas tyre, nuk duhet të ketë asnjë formë reflektimi në qeverisjen aktuale.
Gjatë gjithë protestave, PD ka përsëritur kërkesën për qeveri teknike dhe largimin e kryeministrit Edi Rama.
Ndryshe nga protestat e mëparshme, sot theksi nuk ishte tek fjala politike, por tek prania fizike në rrugë dhe tek aktet me ngarkesë të fortë simbolike.
Mbetet për t’u parë nëse kjo formë e re proteste – pa fjalime, me marshim të gjatë nëpër kryeqytet do të tërheqë pas vetes më shumë qytetarë. Ndërkohë, tensioni në kryeqytet mbetet i lartë dhe policia vijon të mbajë nën kontroll zonat kyçe të qytetit.
